Mumbai News : ‘कॉक्रोच जनता पार्टी’वर आठवले बरसले; म्हणाले, ‘नाव बदलून राजीनामा जनता पार्टी करा’

Mumbai News : मुंबई - केंद्रीय निवडणूक आयोगाचे मुख्य निवडणूक आयुक्त ज्ञानेश कुमार आणि निवडणूक आयुक्त सुखबीरसिंग संधू व विवेक जोशी यांच्यातील कथित मतभेदांमुळे निवडणूक आयोगाच्या कामकाजावरून नवा राजकीय वाद निर्माण झाला आहे. गेल्या दहा महिन्यांत मतदार नोंदणी, मतदारांची नावे वगळणे आणि पुन्हा समाविष्ट करणे तसेच मतदार याद्यांच्या विशेष सखोल पुनरावृत्तीबाबत (SIR) संधू आणि विवेक जोशी यांनी किमान १४ वेळा अधिकृतपणे आक्षेप नोंदवल्याचा दावा केला जात आहे.
SIRच्या मुद्द्यावरून सध्या राजकीय वातावरणही तापले आहे. याच पार्श्वभूमीवर ‘कॉक्रोच जनता पार्टी’चे अभिजीत दिपके यांनी मुख्य निवडणूक आयुक्त ज्ञानेश कुमार यांच्यावर गंभीर आरोप करत त्यांच्या तात्काळ राजीनाम्याची मागणी केली आहे. पुढील ४८ तासांत राजीनामा न दिल्यास देशभर आंदोलन छेडण्याचा इशाराही त्यांनी दिला आहे.

दरम्यान, केंद्रीय मंत्री रामदास आठवले यांनी ‘कॉक्रोच जनता पार्टी’च्या भूमिकेवर टीका केली. “राजीनामा मागण्यासाठी कॉक्रोच जनता पार्टी आहे का? त्यांनी आपले नाव बदलून ‘राजीनामा जनता पार्टी’ करावे,” असा खोचक टोला आठवले यांनी लगावला.
यावेळी आठवले यांनी मुख्य निवडणूक आयुक्त ज्ञानेश कुमार यांची पाठराखण केली. ज्ञानेश कुमार यांनी कोणाच्याही दबावाखाली राजीनामा देऊ नये, असे मत त्यांनी व्यक्त केले.
निवडणूक आयोगाच्या निर्णयांवरून निर्माण झालेल्या या वादाच्या पार्श्वभूमीवर SIR, मतदार याद्यांतील बदल आणि निवडणूक आयोगातील कथित मतभेद याबाबत पुढील काळात राजकीय आरोप-प्रत्यारोप आणखी तीव्र होण्याची शक्यता आहे.