Pune Crime : अंमली पदार्थ तस्करीतील सराईतावर ‘PIT-NDPS’चा बडगा

Pune Crime : पुणे, महाराष्ट्र मिरर : अंमली पदार्थांची खरेदी-विक्री आणि तस्करीत सातत्याने सहभागी असल्याचा आरोप असलेल्या सराईत गुन्हेगार शुभम बबन वाघमारे याच्याविरुद्ध ‘PIT-NDPS Act, 1988’ अंतर्गत स्थानबद्धतेची कारवाई प्रस्तावित करण्यात आली आहे. परिमंडळ-३चे पोलीस उपायुक्त डॉ. सागर कवडे यांनी हा प्रस्ताव पुणे पोलीस आयुक्तांमार्फत महाराष्ट्राच्या पोलीस महासंचालकांकडे सादर केला आहे.https://maharashtramirror.com/ Pune Crime

परिमंडळ-३च्या हद्दीत अंमली पदार्थांची खरेदी-विक्री आणि तस्करी करणाऱ्यांवर लक्ष ठेवून कारवाई करण्याच्या सूचना संबंधित पोलीस ठाण्यांना देण्यात आल्या होत्या. त्यानुसार सिंहगड रोड पोलीस ठाण्याचे वरिष्ठ पोलीस निरीक्षक विनय पाटणकर यांच्या पथकाकडून कारवाई करण्यात आली. https://maharashtramirror.com/ Pune Crime

पोलिसांच्या माहितीनुसार, राजाबाबू रमेश प्रसाद हा अंमली पदार्थांची विक्री करताना आढळून आल्यानंतर त्याच्याविरुद्ध सिंहगड रोड पोलीस ठाण्यात गुन्हा क्रमांक १२०/२०२६ दाखल करण्यात आला. एनडीपीएस कायद्यातील संबंधित कलमांनुसार हा गुन्हा नोंदविण्यात आला आहे.

या गुन्ह्याच्या तपासादरम्यान राजाबाबू प्रसाद याने विक्रीसाठी आणलेला गांजा शुभम बबन वाघमारे याच्याकडून आणल्याचे निष्पन्न झाल्याचे पोलिसांनी म्हटले आहे. वाघमारेविरुद्ध यापूर्वीही एनडीपीएस कायद्यांतर्गत गुन्हे दाखल असल्याचे पोलिसांचे म्हणणे आहे.

अंमली पदार्थांच्या अवैध व्यवहारातील त्याचा कथित सातत्यपूर्ण सहभाग आणि पूर्वीचे गुन्हे विचारात घेऊन त्याच्याविरुद्ध PIT-NDPS कायद्यानुसार स्थानबद्धतेचा प्रस्ताव तयार करण्यात आला. पोलीस उपायुक्त डॉ. सागर कवडे यांनी हा प्रस्ताव पुढील कार्यवाहीसाठी पोलीस आयुक्तांमार्फत राज्याच्या पोलीस महासंचालकांकडे पाठविला आहे.