Nashik News : सिंहस्थ कुंभमेळा २०२७ : भाविकांसाठी आनंदाची बातमी! नाशिक-त्र्यंबकेश्वर कुंभमेळ्याचे अधिकृत संकेतस्थळ सुरू; पर्वणी स्नानापासून प्रवासापर्यंतची माहिती मिळणार एका क्लिकवर

Nashik News : नाशिक : सिंहस्थ कुंभमेळा २०२७ च्या पार्श्वभूमीवर राज्य सरकार आणि जिल्हा प्रशासनाकडून जय्यत तयारी सुरू झाली आहे. कुंभपर्वाच्या ध्वजारोहण सोहळ्यानंतर या भव्य धार्मिक सोहळ्याला औपचारिक सुरुवात झाली आहे. या पार्श्वभूमीवर नाशिक-त्र्यंबकेश्वर सिंहस्थ कुंभमेळा प्राधिकरणाने भाविकांसाठी अधिकृत संकेतस्थळ सुरू केले आहे. त्यामुळे आता कुंभमेळ्याशी संबंधित महत्त्वाची माहिती भाविकांना एकाच ठिकाणी उपलब्ध होणार आहे.https://maharashtramirror.com/ Nashik News

ध्वजारोहण सोहळ्याला राष्ट्रपती द्रौपदी मुर्मू, मुख्यमंत्री देवेंद्र फडणवीस, दोन्ही उपमुख्यमंत्री, राज्यपाल तसेच राज्यातील अनेक मंत्री आणि मान्यवर उपस्थित होते. यावेळी सिंहस्थ कुंभमेळ्याचे अधिकृत टायटल साँग आणि संकेतस्थळाचेही लोकार्पण करण्यात आले..https://maharashtramirror.com/ Nashik News

कुंभमेळ्यासाठी सुरू करण्यात आलेल्या अधिकृत संकेतस्थळावर नाशिक आणि त्र्यंबकेश्वर येथील पर्वणी स्नानाच्या तारखा व वेळा, महत्त्वाच्या घोषणा, धार्मिक स्थळांची माहिती आणि भाविकांसाठी आवश्यक सूचनांचा समावेश करण्यात येणार आहे. तसेच प्रवासाचे नियोजन, वाहतुकीचे पर्याय, निवास व्यवस्था आणि विविध सुविधांची माहितीही टप्प्याटप्प्याने उपलब्ध करून दिली जाणार आहे.

सिंहस्थ कुंभमेळ्याचे धार्मिक महत्त्व, इतिहास, परंपरा, प्रमुख मंदिरे, घाट आणि आखाड्यांची माहितीही या संकेतस्थळावर मिळणार आहे. विमान, रेल्वे आणि रस्ते वाहतुकीने नाशिक व त्र्यंबकेश्वर येथे कसे पोहोचावे, याची माहिती भाविकांना मिळू शकेल.

कुंभमेळ्यासाठी येणाऱ्या भाविकांना स्वच्छतागृहे, पिण्याच्या पाण्याची ठिकाणे, वैद्यकीय मदत केंद्रे, रुग्णालये, वाहनतळ, निवास व्यवस्था आणि मदत कक्षांची माहिती उपलब्ध करून देण्याचे नियोजन आहे. आपत्कालीन संपर्क क्रमांक आणि सार्वजनिक सुरक्षेसंबंधी सूचनांनाही संकेतस्थळावर प्राधान्य दिले जाणार आहे.

सिंहस्थ कुंभमेळ्याशी संबंधित अचूक आणि अधिकृत माहिती मिळावी, हा संकेतस्थळ सुरू करण्यामागील मुख्य उद्देश आहे. यासाठी शासकीय विभाग, महापालिका, धार्मिक संस्था, पर्यटन व वाहतूक क्षेत्रातील घटक आणि प्रसारमाध्यमांनी संकेतस्थळाची माहिती अधिकाधिक भाविकांपर्यंत पोहोचवावी, असे आवाहन कुंभमेळा प्राधिकरणाच्या वतीने करण्यात आले आहे.

सिंहस्थ कुंभमेळ्याच्या तयारीला वेग आला असताना या संकेतस्थळामुळे भाविकांना कुंभयात्रेचे नियोजन करणे अधिक सोपे होणार असून, आवश्यक माहिती एका क्लिकवर उपलब्ध होण्यास मदत होणार आहे.