भीमा कोरेगाव शौर्य दिन: उपमुख्यमंत्री अजित पवार यांच्याकडून विजयस्तंभाला विनम्र अभिवादन!

Ajit Pawar At Bhima Koregaon : 208 व्या शौर्यदिनानिमित्त पेरणे फाटा येथे जनसागर; प्रशासकीय नियोजनावर अजित पवारांकडून समाधान

पुणे | आज 1 जानेवारी 2026 रोजी, कोरेगाव भीमा येथील ऐतिहासिक लढाईच्या 208 व्या शौर्यदिनानिमित्त राज्याचे उपमुख्यमंत्री आणि पुणे जिल्ह्याचे पालकमंत्री अजित पवार यांनी विजयस्तंभाला भेट देऊन शूरवीरांना पुष्पहार अर्पण केला. "शूरवीरांचे हे बलिदान पिढ्यानपिढ्यांसाठी प्रेरणादायी आहे," अशा शब्दांत त्यांनी ऐतिहासिक लढाईतील वीरांना आपली श्रद्धांजली वाहिली.

शासकीय मानवंदना आणि प्रशासकीय पाहणी

अजित पवार यांनी सकाळी लवकर विजयस्तंभाला भेट देऊन शासकीय मानवंदना स्वीकारली. यावेळी त्यांच्यासोबत जिल्हाधिकारी जितेंद्र डुडी, 'बार्टी'चे महासंचालक सुनील वारे आणि वरिष्ठ पोलीस अधिकारी उपस्थित होते. यावर्षी सुमारे 20 लाख अनुयायी येण्याचा अंदाज लक्षात घेऊन जिल्हा प्रशासनाने केलेल्या पार्किंग, पाणीपुरवठा आणि आरोग्य सुविधांच्या नियोजनाची पवारांनी स्वतः पाहणी केली आणि समाधान व्यक्त केले.

"हा शौर्याचा आणि स्वाभिमानाचा इतिहास"

अभिवादनानंतर प्रसारमाध्यमांशी बोलताना अजित पवार म्हणाले, "हा विजयस्तंभ शौर्याचा आणि स्वाभिमानाचा गौरवशाली इतिहास सांगणारा आहे. दरवर्षीप्रमाणे राज्य शासनाच्या वतीने मी राज्यातील जनतेच्या वतीने येथे नतमस्तक होण्यासाठी आलो आहे. मुख्यमंत्री देवेंद्र फडणवीस यांनी या सोहळ्यासाठी आवश्यक तो सर्व निधी उपलब्ध करून देण्याचे आदेश दिले असून, प्रशासन अनुयायांच्या सोयीसाठी सज्ज आहे."

सुरक्षेचा कडक पहारा

अनुयायांची वाढती गर्दी पाहता परिसरात सुरक्षिततेची चोख व्यवस्था करण्यात आली आहे.परिसरात 13,000 पेक्षा जास्त पोलीस कर्मचारी तैनात करण्यात आले आहेत.

ड्रोन कॅमेरे आणि सीसीटीव्हीच्या माध्यमातून संपूर्ण पेरणे फाटा परिसरावर नजर ठेवली जात आहे. अजित पवार यांनी सर्व अनुयायांना शांततेत आणि शिस्तीत अभिवादन करण्याचे आवाहन केले आहे.