हरियाणाचे DGP कपूर यांच्यासह 13 पोलीस अधिकाऱ्यांवर गुन्हा दाखल; आयपीएस पूरन कुमार आत्महत्या प्रकरणी कारवाई
•IPS Puran Kumar Suicide Case : आत्महत्या करण्यापूर्वी आयपीएस पूरन कुमार यांनी लिहिलेल्या सुसाइड नोटमध्ये अधिकाऱ्यांची नावे ; ‘वरिष्ठांनी जातीय भेदभाव आणि मानसिक छळ केल्याने उचलले टोकाचे पाऊल’ – सुसाइड नोटमधील आरोप
ANI :- हरियाणा पोलीस दलातील वरिष्ठ आयपीएस अधिकारी वाय. पूरन कुमार यांच्या आत्महत्या प्रकरणी अखेर मोठी कारवाई सुरू झाली आहे. चंदीगड पोलिसांनी या प्रकरणी हरियाणाचे पोलीस महासंचालक (DGP) शत्रुजीत सिंह कपूर यांच्यासह 13 कार्यरत आणि निवृत्त पोलीस अधिकाऱ्यांविरोधात गुन्हा दाखल केला आहे. पूरन कुमार यांनी आत्महत्या करण्यापूर्वी लिहिलेल्या सुसाइड नोटमध्ये या अधिकाऱ्यांची नावे नमूद केली होती.
सुसाइड नोटमध्ये गंभीर आरोप
2001 च्या बॅचचे हरियाणा केडरचे आयपीएस अधिकारी पूरन कुमार यांनी आत्महत्या करण्यापूर्वी नऊ पानांची सुसाइड नोट लिहून ठेवली होती. या नऊ पानांमध्ये त्यांनी १३ अधिकाऱ्यांची नावे नमूद केली होती. यादीत हरियाणाचे डीजीपी शत्रुजीत सिंह कपूर आणि रोहतकचे पोलीस अधीक्षक नरेंद्र बिजारनिया यांचीही नावे आहेत.
पूरन कुमार यांनी सुसाइड नोटमध्ये स्पष्ट आरोप केला आहे की:
वरिष्ठ अधिकाऱ्यांकडून त्यांचा मानसिक छळ केला जात होता.
त्यांच्यासोबत जातीवरून भेदभाव केला जात होता.
या छळ आणि भेदभावामुळे ते मानसिकदृष्ट्या खचले होते आणि या त्रासाला कंटाळूनच त्यांनी टोकाचे पाऊल उचलण्याचा निर्णय घेतला.
आयएएस पत्नीच्या तक्रारीनंतर सूत्रं हलली
पूरन कुमार यांच्या आरोपांच्या आधारावर त्यांच्या पत्नी आणि वरिष्ठ आयएएस अधिकारी अमनीत पी. कुमार यांनी बुधवारी चंदीगडच्या सेक्टर-11 येथील पोलीस ठाण्यात तक्रार दाखल केली.
अमनीत कुमार यांनी तक्रारीत डीजीपी शत्रुजीत सिंह कपूर आणि रोहतकचे पोलीस अधीक्षक नरेंद्र बिजारनिया यांच्यासह हरियाणा पोलीस दलातील इतर काही अधिकाऱ्यांनी पूरन कुमार यांना आत्महत्या करण्यास प्रवृत्त केल्याचा (Abetment to suicide) थेट आरोप केला आहे. या तक्रारीनंतर चंदीगड पोलिसांनी तत्काळ गुन्हा दाखल करत कारवाई सुरू केली आहे.
