•राष्ट्रवादी काँग्रेस (अजित पवार) पक्षाचे पिंपरीचे आमदार अण्णा बनसोडे यांची विधानसभा उपाध्यक्षपदी बिनविरोध निवड
मुंबई :- राष्ट्रवादी काँग्रेस (अजित पवार) पक्षाचे पिंपरीचे आमदार अण्णा बनसोडे यांची विधानसभा उपाध्यक्षपदी निवड झाली आहे. उपाध्यक्षपदाच्या निवडणुकीसाठी बनसोडे यांचा एकमेव अर्ज आल्याने त्यांची बिनविरोध निवड झाली आहे. विधानसभा अध्यक्ष राहुल नार्वेकर बुधवारी यांनी अधिकृत घोषणा केली आहे.अर्थसंकल्पीय अधिवेशनाचा आज (बुधवार) शेवटचा दिवस आहे. आज अधिवेशनाचे सूप वाजणार आहे. आजच्या दिवशी अंतिम आठवडा प्रस्तावावर चर्चा सुरू आहे.अशातच आज विधानसभा उपाध्यक्षपदी राष्ट्रवादी काँग्रेस (अजित पवार) अण्णा दादू बनसोडे यांची बिनविरोध आणि एकमतानं निवड करण्यात आली आहे.
उपमुख्यमंत्री अजित पवार यांनीही अण्णा बनसोडे यांचं अभिनंदन केलं. दरम्यान, यावेळी 2019 विधानसभा निवडणुकीत अण्णा बनसोडेंना पक्षाकडून एबी फॉर्म आपण कसा दिला. याबद्दल मजेशीर किस्सा अजित पवारांनी सांगितला. त्यावेळी सभागृहात एकच हशा पिकला.
आमदार अण्णा बनसोडे हे पुणे जिल्ह्यातील पिंपरी विधानसभा मतदारसंघातून आमदारपदी निवडून आले आहेत. 2009 मध्ये ते पहिल्यांदा आमदार झाले. त्यानंतर 2019 आणि 2024 असे सलग दोनवेळा त्यांनी पुन्हा आमदारकी मिळवली. राष्ट्रवादीत पडलेल्या फुटीनंतर ते अजित पवार यांच्या पाठीशी राहिले आणि 2024 च्या विधानसभा निवडणुकीत पुन्हा निवडूनही आले. दादांचा बालेकिल्ला असलेल्या पिंपरीचे ते भक्कम शिलेदार मानले जातात.
