Maha Satya Morcha : मतदारयादीतील घोळ आणि मतचोरीविरोधात आज मुंबईत महा’सत्याचा मोर्चा’!
•ठाकरे, पवार, राज ठाकरे एकाच मंचावर; निवडणुका थांबवून याद्या तपासा, ही प्रमुख मागणी
मुंबई :- मतदार याद्यांमधील कथित घोळ, दुबार मतदार आणि निवडणुकीतील गैरव्यवहारांविरोधात आज (1 नोव्हेंबर) विरोधी पक्ष एकवटले आहेत. महाविकास आघाडी (MVA) आणि महाराष्ट्र नवनिर्भात सेना (मनसे) यांनी एकत्र येत निवडणूक आयोगाच्या विरोधात ‘सत्याचा मोर्चा’ काढला आहे.
या महत्त्वपूर्ण आंदोलनात उद्धव ठाकरे, राज ठाकरे, शरद पवार, जयंत पाटील, बाळासाहेब थोरात यांच्यासह दोन्ही आघाड्यांचे प्रमुख नेते सहभागी होत आहेत. लोकांना सत्य कळावे आणि असत्य जनतेसमोर यावे, या उद्देशाने हा मोर्चा आयोजित करण्यात आला आहे.
मोर्चा मार्ग आणि नियोजन
वेळ: मोर्चा दुपारी 12 ते 12.30 च्या दरम्यान सुरू होईल.
प्रारंभ बिंदू: मुंबईतील फॅशन स्ट्रीट येथून मोर्चाला सुरुवात होईल.
मार्ग: फॅशन स्ट्रीटवरून मोर्चा मेट्रो सिनेमा चौकातून पुढे जात मुंबई महापालिकेच्या मुख्यालयाकडे कूच करेल.
समारोप: महापालिकेच्या प्रवेशद्वाराजवळ एक स्टेज उभारण्यात आले आहे, जिथे MVA आणि मनसेच्या नेत्यांची भाषणे होतील. उद्धव ठाकरे, शरद पवार, राज ठाकरे, बाळासाहेब थोरात आणि जयंत पाटील यांची भाषणे अपेक्षित आहेत.
विरोधकांच्या प्रमुख मागण्या
‘सत्याचा मोर्चा’ खालील चार प्रमुख मागण्यांसाठी काढण्यात येत आहे:
महापालिका निवडणुकांच्या आधी मतदार याद्या अद्ययावत कराव्यात आणि त्यामध्ये कोणतीही चूक नसावी.
मतदार याद्या पूर्णपणे अद्ययावत होईपर्यंत निवडणुका घेऊ नयेत; यासाठी सहा महिन्यांचा कालावधी लागला तरी चालेल.
मतदार याद्यांमधील दुबार नावे तात्काळ काढून टाकावीत.
7 नोव्हेंबरपर्यंत मतदार नोंदणीची प्रक्रिया पूर्ण करावी.
यापूर्वी काँग्रेसचे नेते राहुल गांधी यांनीही केंद्रीय निवडणूक आयोगाने मतदार याद्यांमध्ये घोळ घातल्याचा आरोप केला होता. आता राज्यातही MVA आणि मनसे याच मुद्द्यावर आक्रमक झाले असून, पोलिसांकडून परवानगी न मिळाल्याने हा मोर्चा विनापरवाना होण्याची शक्यता आहे.
