World Champion : विश्वचषक विजेत्या भारतीय महिला क्रिकेट संघाने घेतली पंतप्रधान मोदींची भेट

•सलग तीन पराभवानंतरही उल्लेखनीय पुनरागमनाबद्दल पंतप्रधानांकडून संघाचे कौतुक

नवी दिल्ली :- पहिल्यांदाच महिला एकदिवसीय विश्वचषक जिंकणाऱ्या भारतीय महिला क्रिकेट संघाने बुधवारी पंतप्रधान नरेंद्र मोदी यांची भेट घेतली. पंतप्रधानांनी संघाचे त्यांच्या ऐतिहासिक विजयाबद्दल अभिनंदन केले, तसेच सलग तीन पराभव आणि सोशल मीडियावर ट्रोलिंग असूनही संघाने केलेल्या उल्लेखनीय पुनरागमनाचे विशेष कौतुक केले.

भारतीय संघाने 2 नोव्हेंबर रोजी डीवाय पाटील स्टेडियमवर झालेल्या अंतिम सामन्यात दक्षिण आफ्रिकेचा 52 धावांनी पराभव करून महिला विश्वचषक जिंकला होता.

कर्णधार हरमनप्रीत कौरची भावना: भारतीय कर्णधार हरमनप्रीत कौरने यावेळी 2017 मध्ये झालेल्या पंतप्रधान मोदींसोबतच्या भेटीची आठवण करून दिली. ती म्हणाली, "2017 मध्ये आम्ही ट्रॉफीशिवाय भेटलो होतो. यावेळी आम्ही ट्रॉफी घेऊन आलो आहोत. आम्हाला ट्रॉफी घेऊन पुन्हा पुन्हा भेटायचे आहे."

उपकर्णधार स्मृती मंधाना हिनेही पंतप्रधानांनी संघाला दिलेली प्रेरणा महत्त्वपूर्ण असल्याचे सांगितले. "पंतप्रधानांनी सर्वांना प्रेरणा दिली. ते आपल्या सर्वांसाठी प्रेरणास्रोत आहेत," असे स्मृती मंधाना म्हणाली.

या भेटीदरम्यान भारतीय संघासोबत बीसीसीआयचे अध्यक्ष मिथुन मनहास आणि प्रशिक्षक अमोल मुझुमदार हे देखील उपस्थित होते. बांगलादेशविरुद्ध दुखापतग्रस्त झालेली खेळाडू प्रतिका रावल यावेळी व्हीलचेअरवर दिसली.

फोटो गॅलरी