Pune News : पुणे मेट्रोचा विस्तार; २१,८०० कोटींच्या प्रकल्पांची मोदींकडून घोषणा

Pune News : पुणे : पुणे शहराच्या सार्वजनिक वाहतूक व्यवस्थेला नवी दिशा देणाऱ्या मेट्रो प्रकल्पांना आता गती मिळणार आहे. पंतप्रधान नरेंद्र मोदी ३ नोव्हेंबर रोजी पुण्यातील मेट्रोच्या महत्त्वपूर्ण प्रकल्पांचे ऑनलाइन उद्घाटन आणि भूमिपूजन करणार आहेत. सुमारे २१ हजार ८०० कोटी रुपयांच्या विकासकामांमध्ये हिंजवडी ते शिवाजीनगर या पिंक लाईनचे उद्घाटन आणि मेट्रोच्या दुसऱ्या टप्प्याच्या कामाची पायाभरणी समाविष्ट आहे.https://maharashtramirror.com/ Pune News

पुणे मेट्रोच्या लाईन क्रमांक ३ अर्थात पिंक लाईनसाठी ८ हजार ३०० कोटी रुपयांहून अधिक खर्च करण्यात आला आहे. ही मार्गिका पुण्यातील प्रमुख आयटी केंद्र असलेल्या हिंजवडीला शिवाजीनगरशी जोडणार आहे. त्यामुळे आयटी पार्कमध्ये काम करणारे कर्मचारी, विद्यार्थी आणि दररोज या मार्गावरून प्रवास करणाऱ्या नागरिकांना वाहतूक कोंडीतून दिलासा मिळण्याची अपेक्षा आहे.

विशेष म्हणजे, या मेट्रोच्या संचालनासाठी महिला ट्रेन ऑपरेटरची नियुक्ती करण्यात येणार आहे. त्यामुळे सार्वजनिक वाहतूक क्षेत्रात महिलांच्या सहभागाला प्रोत्साहन मिळणार आहे. याशिवाय मेट्रोच्या एकूण विजेच्या गरजेपैकी सुमारे ३० टक्के वीज सौरऊर्जेतून उपलब्ध करून देण्याचे नियोजन आहे. त्यामुळे ऊर्जा बचतीसोबत पर्यावरणपूरक वाहतुकीलाही चालना मिळणार आहे.

हिंजवडी आणि शिवाजीनगर या दोन महत्त्वाच्या भागांना मेट्रोने जोडल्यामुळे शहरातील रस्त्यांवरील खासगी वाहनांचा ताण कमी होण्यास मदत होऊ शकते. मेट्रोच्या दुसऱ्या टप्प्याच्या कामालाही सुरुवात झाल्यानंतर पुणे आणि परिसरातील सार्वजनिक वाहतूक व्यवस्थेच्या विस्ताराला आणखी गती मिळण्याची अपेक्षा आहे.