Mumbai Train Update : मुंबईकरांनो लक्ष द्या! रविवारी रेल्वेचा 'मेगाब्लॉक'; ट्रान्स हार्बर ठप्प, पश्चिम रेल्वेवर मध्यरात्री जम्बो ब्लॉक

Mumbai Local Train Update : ठाणे-वाशी-नेरूळ सेवा 5 तास बंद; प्रभादेवी स्थानकावर पायाभूत सुविधांच्या कामासाठी विशेष टप्पे, प्रवाशांना नियोजनाचे आवाहन

मुंबई :- रेल्वेमार्गावरील नियमित देखभाल, दुरुस्ती आणि महत्त्वाच्या पायाभूत सुविधांच्या कामांसाठी उद्या, रविवार (22 मार्च 2026) रोजी मध्य रेल्वेच्या ट्रान्स हार्बर मार्गावर मेगाब्लॉक, तर पश्चिम रेल्वेवर मध्यरात्री जम्बो ब्लॉक घेण्यात येणार आहे. या कामांमुळे अनेक उपनगरीय लोकल फेऱ्या रद्द करण्यात आल्या असून, काही गाड्यांच्या मार्गात बदल करण्यात आला आहे. सुट्टीच्या दिवशी प्रवासाचे नियोजन करणाऱ्या प्रवाशांनी वेळापत्रक तपासूनच घराबाहेर पडावे, असे आवाहन रेल्वे प्रशासनाकडून करण्यात आले आहे.

ट्रान्स हार्बर मार्ग: ठाणे ते नवी मुंबई संपर्क तुटणार

ट्रान्स हार्बर मार्गावर ठाणे ते वाशी/नेरूळ दरम्यान अप आणि डाऊन मार्गावर पाच तासांचा ब्लॉक घेण्यात आला आहे. यामुळे ठाणे आणि नवी मुंबई दरम्यानची लोकल सेवा पूर्णपणे विस्कळीत राहणार आहे.

वेळ: सकाळी 11.10 ते दुपारी 4.10 वाजेपर्यंत.

परिणाम: ब्लॉक कालावधीत ठाणे ते वाशी आणि नेरूळ दरम्यान धावणाऱ्या सर्व अप आणि डाऊन लोकल फेऱ्या रद्द राहतील.

अडचण: ठाण्याहून वाशी, नेरूळ आणि पनवेलकडे जाणाऱ्या सेवा सकाळी 10.35 ते सायं. 04.07 दरम्यान बंद राहतील. तसेच परतीच्या दिशेने (पनवेल/वाशीहून ठाण्याकडे) येणाऱ्या लोकल सकाळी 10.25 ते सायं. 4.09 पर्यंत रद्द असतील.

पश्चिम रेल्वे: प्रभादेवी स्थानकावर जम्बो ब्लॉक

पश्चिम रेल्वेवर प्रभादेवी स्थानक परिसरात सर्व मार्गांवर मध्यरात्रीचा जम्बो ब्लॉक घेण्यात येणार आहे.

वेळ: रविवार मध्यरात्री 1.30 ते रविवारी सकाळी 6.00 वाजेपर्यंत.

परिणाम: या कालावधीत चर्चगेट ते प्रभादेवी आणि माटुंगा रोड ते माहीम दरम्यान कोणतीही लोकल धावणार नाही.

बदल: काही लोकल फेऱ्या दादर आणि वांद्रे स्थानकावर शॉर्ट-टर्मिनेट (त्याच स्थानकापर्यंत) करून तिथूनच परतीच्या दिशेने चालवल्या जातील.

वसई रोड ते विरार: धीम्या गाड्या जलद मार्गावर

वसई रोड ते विरार दरम्यान अप आणि डाऊन धीम्या मार्गावर शनिवारी मध्यरात्रीनंतर ब्लॉक असेल.

वेळ: शनिवार मध्यरात्री 12.15 ते रविवार पहाटे 4.15 वाजेपर्यंत.

परिणाम: वसई ते विरार दरम्यान धावणाऱ्या सर्व धीम्या लोकल विरार, वसई रोड ते बोरिवली दरम्यान जलद मार्गावर वळवण्यात येतील.

मेल-एक्स्प्रेस सेवांवरही परिणाम

या मेगाब्लॉकचा परिणाम केवळ लोकलच नव्हे, तर लांब पल्ल्याच्या मेल आणि एक्स्प्रेस गाड्यांच्या वेळापत्रकावरही होण्याची शक्यता आहे. काही गाड्या नियोजित वेळेपेक्षा उशिराने धावतील, तर काहींचे मार्ग बदलले जाऊ शकतात. प्रवाशांच्या सोयीसाठी काही स्थानकांवर जादा बस फेऱ्या सोडण्याचे नियोजन स्थानिक परिवहन प्रशासनाकडून केले जाऊ शकते.