Iran Israel War : इराण-इस्रायल युद्धाचा 'भडका' आता थेट भारतीय स्वयंपाकघरात; खाद्यतेलाच्या किमतीत किलोमागे 15 रुपयांची वाढ

Mumbai Latest Business Update : पुरवठा साखळी विस्कळीत झाल्याने पामतेल, सूर्यफूल आणि शेंगदाणा तेल महागले; सणासुदीच्या तोंडावर गृहिणींचे बजेट कोलमडले

मुंबई :- पश्चिम आशियातील इराण आणि इस्रायलमधील वाढत्या तणावाचे भीषण पडसाद आता भारताच्या बाजारपेठेत उमटू लागले आहेत. आंतरराष्ट्रीय स्तरावर कच्च्या तेलाची पुरवठा साखळी विस्कळीत झाल्यामुळे खाद्यतेलाच्या किमतींनी उच्चांक गाठला असून, अवघ्या काही दिवसांतच खाद्यतेल प्रति किलो 13 ते 15 रुपयांनी महागले आहे. ऐन सणासुदीच्या काळात सर्वसामान्यांच्या खिशाला मोठी कात्री लागली आहे.

खाद्यतेलाचे नवे दर आणि दरवाढ

किराणा व्यापाऱ्यांनी दिलेल्या माहितीनुसार, केवळ खाद्यतेलच नाही तर वनस्पती तूप (डालडा) आणि पूजेच्या सुगंधी तेलाचे भावही कडाडले आहेत. युद्धाचा परिणाम म्हणून आयातीवर मर्यादा आल्याने ही दरवाढ अटळ ठरली आहे.

पाम तेल: पूर्वी 120 रुपये असलेले पाम तेल आता 135 रुपयांवर पोहोचले आहे.

सूर्यफूल तेल: 140 रुपयांवरून थेट 155 रुपये प्रति लिटर इतका दर झाला आहे.

शेंगदाणा तेल: 180 रुपयांचे शेंगदाणा तेल आता 190 रुपयांना मिळत आहे.

डालडा: वनस्पती तूपाच्या किमतीतही प्रति किलो 10 रुपयांची वाढ नोंदवण्यात आली आहे.

खाद्यपदार्थ आणि हमालीवरही परिणाम

तेलाच्या दरवाढीचा थेट परिणाम तेलात तळून बनवल्या जाणाऱ्या खाद्यपदार्थांवर झाला आहे. फरसाण, शेव आणि फ्राई नूडल्सच्या किमतीत प्रति किलो 5 रुपयांची वाढ झाली आहे. इतकेच नव्हे तर इंधन टंचाई आणि वाहतुकीच्या समस्यांमुळे हमालीचे दरही वाढल्याने किरकोळ बाजारात सर्वच वस्तू महागल्या आहेत.

बाजारात चिंतेचे वातावरण

विशेषतः सूर्यफूल आणि सोयाबीन तेलाच्या पुरवठ्यावर परिणाम झाल्याने मध्यमवर्गीय कुटुंबांचे आर्थिक गणित बिघडले आहे. किराणा दुकानदारांच्या मते, जर युद्ध असेच लांबले तर येत्या काळात या किमतीत आणखी वाढ होण्याची शक्यता नाकारता येत नाही. खाद्यतेलासोबतच इतर जीवनावश्यक वस्तूंच्या किमतीही वाढत असल्याने ग्राहकांमध्ये घबराट पसरली आहे.