Farmer Help : बळीराज्यासाठी आनंदाची बातमी; दुष्काळग्रस्त शेतकऱ्यांच्या बँक खात्यात 5 हजार रुपयांची मदत जमा होण्यास सुरुवात
•मुख्यमंत्र्यांच्या आदेशानंतर उर्वरित शेतकऱ्यांच्या खात्यात आज आणि उद्या जमा होणार पैसे; दिवाळीपूर्वी मिळालेल्या मदतीमुळे शेतकऱ्यांची दिवाळी गोड होणार
1 मिनट पठन
•मुख्यमंत्र्यांच्या आदेशानंतर उर्वरित शेतकऱ्यांच्या खात्यात आज आणि उद्या जमा होणार पैसे; दिवाळीपूर्वी मिळालेल्या मदतीमुळे शेतकऱ्यांची दिवाळी गोड होणार
मुंबई :- राज्यातील दुष्काळग्रस्त भागातील शेतकऱ्यांसाठी एक अत्यंत दिलासादायक बातमी समोर आली आहे. राज्य सरकारने जाहीर केलेली 5 हजार रुपयांची अग्रीम मदत आता पात्र शेतकऱ्यांच्या बँक खात्यांमध्ये जमा होण्यास सुरुवात झाली आहे. मुख्यमंत्री देवेंद्र फडणवीस यांनी दिलेल्या कडक निर्देशानंतर, ज्या शेतकऱ्यांच्या खात्यात अजून ही रक्कम पोहोचली नव्हती, त्यांच्या खात्यात आज आणि उद्या उर्वरित सर्व रक्कम जमा केली जाणार आहे. ऐन दिवाळीच्या तोंडावर हा निधी मिळत असल्याने शेतकरी वर्गामध्ये आनंदाचे वातावरण पाहायला मिळत आहे.
राज्यातील 305 तालुक्यांत दुष्काळ जाहीर
महाराष्ट्रात यंदा अपुऱ्या पावसामुळे निर्माण झालेल्या परिस्थितीमुळे राज्य सरकारने एकूण 305 तालुक्यांमध्ये दुष्काळ जाहीर केला आहे. या बिकट परिस्थितीत बळीराजाला आर्थिक आधार मिळावा आणि त्यांची दिवाळी गोड व्हावी, यासाठी शासनाकडून ही विशेष अग्रीम मदत देण्यात येत आहे. आतापर्यंत सुमारे 73 लाख शेतकऱ्यांच्या बँक खात्यामध्ये ही रक्कम यशस्वीपणे जमा करण्यात आली असून, उर्वरित पात्र शेतकऱ्यांच्या खात्यातही तातडीने पैसे जमा करण्याचे काम अंतिम टप्प्यात आले आहे.
मंत्र्यांना शेतकऱ्यांसोबत दिवाळी साजरी करण्याचे निर्देश
या सर्व पार्श्वभूमीवर मुख्यमंत्री देवेंद्र फडणवीस यांनी राज्यातील सर्व मंत्र्यांना आणि प्रशासनाला कडक निर्देश दिले असून, सर्व मंत्र्यांनी यंदाची दिवाळी दुष्काळग्रस्त भागातील शेतकऱ्यांसोबत साजरी करावी, असे आवाहन केले आहे. तसेच, राज्य सरकारने केंद्राकडे नुकसान भरपाईसाठी 40 हजार कोटी रुपयांचा प्रस्ताव पाठवला असून, जनावरांसाठी चारा व पाण्याची योग्य व्यवस्था करण्याचे आदेशही प्रशासनाला देण्यात आले आहेत.