Shingtone News : चंद्र आमचा आहे’ म्हणत ट्रम्प यांची नवी पोस्ट; ‘न्यू अमेरिका’ नावाचीही सूचना

Shingtone News :शिंग्टन : अमेरिकेचे राष्ट्राध्यक्ष डोनाल्ड ट्रम्प पुन्हा एकदा सोशल मीडिया पोस्टमुळे चर्चेत आले आहेत. ट्रम्प यांनी चंद्राचा फोटो शेअर करत ‘चंद्र आमचा आहे’ असा दावा केला. या फोटोमध्ये चंद्राच्या पार्श्वभूमीवर पृथ्वी आणि अमेरिकेचा ध्वज दिसत आहे. ट्रम्प यांच्या या पोस्टनंतर सोशल मीडियावर चर्चेला उधाण आले असून, नेटकऱ्यांकडून संमिश्र प्रतिक्रिया व्यक्त केल्या जात आहेत.

ट्रम्प यांनी सोशल मीडियावर चंद्राचा फोटो शेअर केला. या फोटोसोबत त्यांनी ‘चंद्र आमचा आहे’ असे लिहिले. फोटोमध्ये चंद्राच्या मागे पृथ्वी आणि अमेरिकेचा ध्वज दाखवण्यात आला आहे. त्यांच्या या पोस्टची सोशल मीडियावर मोठ्या प्रमाणात चर्चा सुरू झाली आहे.
यूएस स्पेस फोर्सचा नवा गणवेश
चंद्राचा फोटो पोस्ट करण्याच्या काही मिनिटांपूर्वी ट्रम्प यांनी यूएस स्पेस फोर्सच्या नव्या सर्व्हिस ड्रेस युनिफॉर्मच्या एआय-निर्मित प्रतिमा शेअर केल्या. या नव्या काळ्या गणवेशामध्ये खांद्यावर व कॉलरवर चिन्हे, बाहीवर पॅचेस आणि बेल्टचा समावेश आहे. ट्रम्प यांनी गणवेशातील रंगांचे वर्णन ‘स्पेस ग्रे, मिडनाईट ब्लॅक, सिल्व्हर ग्रे आणि सॅटिन ब्लॅक’ असे केले.
‘न्यू मेक्सिको’चे नाव बदलण्याची सूचना
ट्रम्प यांनी आणखी एका पोस्टमध्ये अमेरिकेतील न्यू मेक्सिको राज्याचे नाव बदलून ‘न्यू अमेरिका’ करण्याचा प्रस्ताव मांडला. हे नाव अधिक प्रतिष्ठित आणि सुंदर असल्याचे मत त्यांनी व्यक्त केले. त्यांच्या या सूचनेवरही सोशल मीडियावर विविध प्रतिक्रिया उमटल्या.
न्यू मेक्सिकोच्या गव्हर्नरचा विरोध
ट्रम्प यांच्या प्रस्तावावर न्यू मेक्सिकोच्या गव्हर्नर मिशेल लुजान ग्रिशम यांनी प्रतिक्रिया दिली. राज्याच्या नावाबाबत कोणताही वाद नसून, अमेरिकेची स्थापना होण्यापूर्वीपासूनच न्यू मेक्सिको हे नाव अस्तित्वात असल्याचे त्यांनी सांगितले. वाढत्या इंधन दरांसारख्या महत्त्वाच्या मुद्द्यांवरून अमेरिकन जनतेचे लक्ष विचलित करण्याचा हा प्रयत्न असल्याची टीकाही त्यांनी केली.
‘लेक अमेरिका’नंतर आता ‘न्यू अमेरिका’ची चर्चा
याआधीही ट्रम्प यांनी भौगोलिक नाव बदलण्याची भूमिका घेतली होती. कॅनडासोबतच्या व्यापारविषयक वादाच्या पार्श्वभूमीवर त्यांनी ओंटारियो सरोवराचे नाव बदलून ‘लेक अमेरिका’ करण्याच्या दस्तऐवजावर स्वाक्षरी केल्याचे सांगण्यात आले होते. २७ ऑगस्ट रोजी ओव्हल ऑफिसमधून यासंदर्भातील घोषणा करण्यात आली होती.
व्हाईट हाऊसच्या पोस्टमुळेही चर्चा
दरम्यान, व्हाईट हाऊसच्या सोशल मीडिया अकाउंटवरून ट्रम्प यांचा हिरवी पॉवर रिंग घातलेला एआय व्हिडीओही शेअर करण्यात आला. चंद्राचा फोटो, स्पेस फोर्सचा गणवेश, ‘न्यू अमेरिका’ची सूचना आणि एआय व्हिडीओ अशा सलग पोस्टमुळे ट्रम्प पुन्हा एकदा सोशल मीडिया चर्चेच्या केंद्रस्थानी आले आहेत.