CRIME NEWS : बारामतीत खोट्या पोलिसांनी लुटले वृद्धेचे पावणेदोन लाखांचे दागिने

दोन दुचाकीस्वार भामट्यांची हातचलाखी; सोन्याच्या बांगड्यांच्या जागी ठेवल्या काचेच्या बांगड्या

बारामती CRIME NEWS: बारामती शहरातील संभाजीनगर रस्त्यावर सकाळी दूध घेऊन पायी घरी परतणाऱ्या एका ७० वर्षीय वृद्ध गृहिणीला गाठून दोन तोतया (खोट्या) पोलिसांनी तब्बल १ लाख ८० हजार रुपये किमतीच्या सोन्याच्या बांगड्या शिताफीने लांबवल्याची धक्कादायक घटना समोर आली आहे.

दुचाकीवरून आलेल्या दोन अज्ञात भामट्यांनी “आम्ही पोलीस आहोत” अशी बतावणी केली आणि “पुढे दोन महिलांचे सोने चोरीला गेले आहे, त्यामुळे तुमचे दागिने काढून कागदाच्या पुडक्यात ठेवा,” असे भासवले. वृद्धेला विश्वासात घेऊन आरोपींनी हातचलाखीने सोन्याच्या बांगड्या काढून घेतल्या आणि पुडक्यात सोन्याऐवजी काचेच्या बांगड्या ठेवून त्यांची फसवणूक केली. या गंभीर फसवणुकीप्रकरणी बारामती शहर पोलीस ठाण्यात गुन्हा दाखल करण्यात आला असून तोतया पोलिसांच्या या वाढत्या उपद्रवामुळे महिला वर्गात भीतीचे वातावरण पसरले आहे.CRIME NEWS

या संदर्भातील तोतया पोलिसांकडून झालेल्या फसवणुकीच्या गंभीर घटनेबाबत बारामती येथील संभाजीनगर परिसरामध्ये राहणाऱ्या विमल दिगंबर सुतार (वय ७० वर्षे, धंदा: गृहिणी) यांनी बारामती शहर पोलीस ठाण्यात रीतसर फिर्याद दिली आहे. त्यांच्या तक्रारीवरून पोलिसांनी दुचाकीवरून आलेल्या दोन अज्ञात संशयित तोतया पोलिसांवर भारतीय न्याय संहिता (बीएनएस) कलम ३१८(४), ३१९(२) आणि ३(५) अन्वये गुन्हा नोंदवला आहे.

या फसवणुकीच्या घटनेमध्ये १ लाख ८० हजार रुपये किमतीच्या ६० ग्रॅम वजनाच्या सोन्याच्या ४ बांगड्या (प्रत्येकी १५ ग्रॅम वजनाची व प्रत्येकी ४५ हजार रुपये किमतीची बांगडी) तोतयांनी चोरून नेल्या आहेत. हा प्रकार मंगळवार (ता. ९) जून २०२६ रोजी सकाळी अकरा वाजण्याच्या सुमारास संभाजीनगर रस्त्यावरील सार्वजनिक रस्त्यावर घडला.CRIME NEWS

पीडित महिला घराशेजारील दुकानातून परत येत होत्या
पोलिसांनी दिलेल्या सविस्तर माहितीनुसार, ७० वर्षीय विमल सुतार या मंगळवारी सकाळी अकरा वाजण्याच्या सुमारास घराशेजारी असलेल्या एका किराणा दुकानातून दूध खरेदी करून पायी घरी परतत होत्या. संभाजीनगर रस्त्यावरून जात असताना, त्यांच्याच घराच्या जवळ असलेल्या अनिकेत लोखंडे यांच्या घरासमोरील रस्त्यावर दोन अज्ञात व्यक्ती दुचाकीवरून आल्या आणि त्यांनी सुतार यांना थांबवले. दुचाकीवरील आरोपींनी सुतार यांना आपण पोलीस अधिकारी असल्याचे भासवले. “आम्ही पोलीस आहोत, पुढे तपासणी सुरू आहे. येथे जवळच दोन महिलांचे सोन्याचे दागिने चोरीला गेले आहेत. तुम्ही गळ्यात व हातात एवढे सोने घालून का फिरता? हातातील सोन्याच्या बांगड्या काढून घ्या,” असे सांगून त्यांनी सुतार यांच्या मनात मोठी भीती निर्माण केली.

तोतया पोलिसांच्या बोलण्यावर ठेवला विश्वास
या तोतया पोलिसांच्या बोलण्यावर पूर्ण विश्वास ठेवून घाबरलेल्या विमल सुतार यांनी आपल्या हातातील प्रत्येकी १५ ग्रॅम वजनाच्या एकूण ४ सोन्याच्या बांगड्या काढून आरोपींच्या हातात दिल्या. आरोपींनी त्या बांगड्या एका कागदाच्या पुडक्यात ठेवण्याचे नाटक केले. दरम्यान, सुतार यांचे लक्ष विचलित करून आरोपींनी अत्यंत शिताफीने आणि शिताफ हाताने मूळ सोन्याच्या बांगड्या स्वतःजवळ लपवल्या आणि कागदाच्या पुडक्यात काचेच्या बांगड्या ठेवून ते पुडके सुतार यांच्या हातात दिले.

CRIME NEWS

“घरी जाईपर्यंत हे पुडके उघडू नका,” अशी सक्त ताकीद देऊन दोन्ही तोतया पोलीस दुचाकीवरून अत्यंत वेगाने पसार झाले. घरी पोहोचल्यानंतर विमल सुतार यांनी पुडके उघडून पाहिले असता, त्यामध्ये सोन्याऐवजी काचेच्या बांगड्या असल्याचे पाहून त्यांना मोठा धक्का बसला. आपली फसवणूक झाल्याचे समजताच त्यांनी कुटुंबीयांसह बारामती शहर पोलीस ठाणे गाठून बुधवारी दुपारी गुन्हा नोंदवला. बारामती शहर पोलीस ठाण्याचे पोलीस हवालदार पवार या तोतया पोलिसांच्या टोळीचा पुढील सखोल तपास करत आहेत.

CRIME NEWS