"राजकारणापलीकडचे सहप्रवासाचे नाते!"; देवेंद्र फडणवीसांकडून उद्धव ठाकरेंच्या 'ठाकरी' बाण्याचं आणि संवेदनशील मनाचं कौतुक

•"स्वभाव राजकारणी नाही, निर्णय घेताना परिणामांची चिंता केली नाही"; विधान परिषदेतील निरोप समारंभात फडणवीसांनी जागवल्या जुन्या आठवणी

मुंबई :- विधान परिषदेच्या नऊ सदस्यांच्या निवृत्तीनिमित्त आज सभागृहात एक भावनिक सोहळा पार पडला. राजकीय मैदानात एकमेकांवर तुटून पडणारे नेते आज जुन्या मैत्रीचे पदर उलगडताना दिसले. विशेषतः उपमुख्यमंत्री देवेंद्र फडणवीस यांनी शिवसेना (ठाकरे) पक्षप्रमुख उद्धव ठाकरे यांच्याबद्दल काढलेले उद्गार राजकीय वर्तुळात चर्चेचा विषय ठरले आहेत. "उद्धवजींचा स्वभाव राजकारणी नाही, तर एकदा ठरवले की निर्णय घेणारा बाळासाहेबांसारखाच त्यांचा बाणा आहे," अशा शब्दांत फडणवीसांनी त्यांच्या व्यक्तिमत्त्वाचा गौरव केला.

राजकारणापलीकडचे 'सहप्रवासाचे' नाते

फडणवीस म्हणाले की, राजकारणात मतभेद आणि संघर्ष असतोच, पण त्यापलीकडेही एक नाते असते, ते म्हणजे सहप्रवासाचे. "आम्ही अनेक वर्षे एकत्र प्रवास केला आहे. राज्यासाठी आणि समाजासाठी अनेक चांगल्या गोष्टी एकत्रित करण्याची संधी आम्हाला मिळाली. उद्धवजींच्या व्यक्तिमत्त्वात राजकारण थोडे कमीच आहे. त्यांचा स्वभाव रोखठोक असून एकदा निर्णय घेतला की ते परिणामांची चिंता करत नाहीत."

कॅमेऱ्यामागचे संवेदनशील मन

उद्धव ठाकरेंच्या फोटोग्राफीच्या छंदावर भाष्य करताना फडणवीस यांनी त्यांच्या संवेदनशीलतेचे कौतुक केले.

संस्कृतीची जपणूक: "त्यांनी केवळ फोटो काढले नाहीत, तर 'महाराष्ट्र देशा' आणि 'पाहावा विठ्ठल'च्या माध्यमातून आपली संस्कृती जपली आहे. वारीचे चित्रीकरण करताना हेलिकॉप्टरच्या उघड्या दरवाजातून त्यांनी जो धोका पत्करला, त्यातून त्यांच्या कलेप्रती असलेली जिद्द दिसून येते."

निसर्गप्रेम: गड-किल्ले, निसर्ग आणि वारकरी परंपरा कॅमेऱ्यात कैद करताना त्यामागे त्यांचे एक हळवे आणि संवेदनशील मन पाहायला मिळते, असेही फडणवीस म्हणाले.

2014 नंतरची ती मैत्री…

आपल्या मैत्रीचा काळ आठवताना फडणवीस म्हणाले, "2010 आणि 2014 नंतर आमची जवळीक अधिक वाढली. त्या काळात एक मैत्रीची भावना निर्माण झाली होती. आज आमच्या राजकीय भूमिका वेगळ्या असल्या, तरी ती मैत्रीची भावना आजही आहे, असे म्हणायला मला संकोच वाटत नाही."

सामान्यांना नेतृत्व देण्याचा वारसा

बाळासाहेब ठाकरेंनी सुरू केलेला वारसा उद्धव ठाकरेंनीही जपल्याचे फडणवीस यांनी नमूद केले. "सामान्य माणसाला, ज्याला कोणताही राजकीय चेहरा नाही, त्याला नेतृत्व देण्याचा जो गुण बाळासाहेबांनी रुजवला, तो शिकण्यासारखा आहे. मग ती उद्धवजींची शिवसेना असो किंवा शिंदे साहेबांची, हा गुण दोन्हीकडे दिसतो," असे त्यांनी स्पष्ट केले.