"गरीब-मध्यमवर्गीयांना मारण्यासाठीच हे सरकार

डिझेल १५० तर पेट्रोल १७० रुपये होणार: काँग्रेस नेते विजय वडेट्टीवार यांचा नागपुरातून थेट हल्लाबोळ

नागपूर: देशातील गरीब आणि मध्यमवर्गीय जनतेला पूर्णपणे उद्ध्वस्त करण्यासाठी आणि मारण्यासाठीच सध्याचे सरकार सत्तेवर आले आहे, असा अत्यंत सनसनाटी आणि गंभीर आरोप काँग्रेसचे ज्येष्ठ नेते विजय वडेट्टीवार यांनी नागपुरात आयोजित पत्रकार परिषदेत केला आहे.

देशात सध्या सुरू असलेल्या इंधन दरवाढीवरून त्यांनी तीव्र चिंता व्यक्त केली असून, आगामी एका महिन्यात टप्प्याटप्प्याने डिझेलचे भाव प्रति लिटर १५० रुपयांवर, तर पेट्रोलचे भाव प्रति लिटर १७० रुपयांवर पोहोचलेले दिसतील, असा दावा त्यांनी केला आहे. सध्याचे सत्ताधारी देशाला पूर्णपणे खड्ड्यात घालण्यासाठीच कारभार चालवत असल्याचा घणाघातही वडेट्टीवार यांनी यावेळी केला.

इंधनाचा मोठा तुटवडा
इंधनाच्या कथित तुटवड्यावर बोलताना विजय वडेट्टीवार म्हणाले की, सरकार जरी देशात इंधनाचा कोणताही तुटवडा नसल्याचे सांगत असले, तरी प्रत्यक्षात मात्र अनेक ठिकाणी विमानांची उड्डाणे इंधनाअभावी रद्द करण्यात येत आहेत. त्यामुळे सरकारने इंधनाचा मोठा तुटवडा निर्माण झाल्याची वस्तुस्थिती आधी मान्य केली पाहिजे. देशात पुन्हा एकदा लॉकडाऊनसारखे कठीण दिवस येण्याची शक्यता निर्माण झाली आहे.

बँकिंग व्यवस्था रिकामी
केंद्र सरकारने बँका आणि रिझर्व्ह बँक ऑफ इंडिया मधील राखीव पैसेही काढून घेत संपूर्ण बँकिंग व्यवस्था रिकामी केली आहे, त्यामुळे जनतेने सरकारच्या विश्वासावर कुठेही मोठी गुंतवणूक करू नये; आपले पैसे सुरक्षित ठेवावेत, कारण तो पैसा परत मिळण्याची शाश्वती उरलेली नाही. देश सध्या सर्वच बाजूंनी मोठ्या आर्थिक संकटात सापडला आहे.

निवडणूक आयोग भाजपचा दलाल
निवडणूक आयोगाच्या निष्पक्षतेवर थेट बोट ठेवत वडेट्टीवार यांनी अत्यंत वादग्रस्त आणि आक्रमक विधान केले आहे. ते म्हणाले की, “निवडणूक आयोग हा केवळ भाजपचा दलाल म्हणून काम करत आहे. माझ्या या विधानावर आयोगाला माझ्यावर जी काही कायदेशीर कारवाई करायची आहे, ती त्यांनी खुशाल करावी.” ज्या राज्यांमध्ये भाजपचे सरकार येण्याची शक्यता नाही, त्या राज्यांमध्ये 'एसआयआर’च्या नावाखाली विरोधकांच्या हक्काच्या मतदारांची नावे मतदार यादीतून मोठ्या प्रमाणावर कमी केली जात असल्याचा गंभीर आरोप त्यांनी केला.

देशात महागाई आणि बेरोजगारीमुळे जनता अत्यंत त्रस्त असताना, मूळ प्रश्नांवरून लक्ष विचलित करण्यासाठी सरकारकडून जाणीवपूर्वक धार्मिक तणाव निर्माण केला जात आहे. समाजात धार्मिक तेढ निर्माण करणे हाच सत्ताधाऱ्यांचा धंदा झाला असून, त्यांचे मंत्री मंत्रिपदाच्या शपथेचा भंग करत असल्याचा टोला त्यांनी लगावला.

इंधन टंचाई, आरबीआयचे पैसे आणि लॉकडाऊनचा इशारा
पेट्रोल-डिझेलचा भडका उडणार: विजय वडेट्टीवार यांच्या दाव्यानुसार, आगामी महिनाभरात देशात डिझेल १५० रुपये आणि पेट्रोल १७० रुपये प्रति लिटरच्या ऐतिहासिक पातळीवर पोहोचणार आहे.

आर्थिक संकट आणि गुंतवणूकदारांना सतर्कता: सरकारने रिझर्व्ह बँकेतील (RBI) पैसा काढून बँका रिकाम्या केल्याचा आरोप करत, नागरिकांनी आपले पैसे सुरक्षित ठेवावेत आणि सरकारच्या विश्वासावर गुंतवणूक करू नये, असा सल्ला त्यांनी दिला आहे.

“निवडणूक आयोग भाजपचा दलाल”; मतदार यादीत फेरफारचा आरोप
मतदारांची नावे कट केल्याचा संशय: भाजपची सत्ता नसलेल्या किंवा विरोधक मजबूत असलेल्या राज्यांमध्ये 'SIR’च्या नावाखाली मतदार याद्यांमधून मोठ्या प्रमाणावर मतदारांची नावे वगळली जात असल्याचा गंभीर आरोप वडेट्टीवार यांनी केला.

धार्मिक तेढ निर्माण करण्याचा धंदा: महागाई, बेरोजगारी आणि लोकांचा जाणारा जीव या मुख्य प्रश्नांवर पडदा टाकण्यासाठी सत्ताधाऱ्यांकडून केवळ धार्मिक भावना भडकवून राजकारण केले जात असल्याची टीका त्यांनी केली.