Pune News : टार्गेट इन्फ्रा डेव्हलपर्स'वर पुणे मनपाने ठोठावला दंड

Pune News : पुणे: पुणे महानगरपालिकेच्या कसबा पेठ क्षेत्रीय कार्यालयांतर्गत येणाऱ्या लोहीयानगर परिसरात अनधिकृतपणे ड्रेनेज चेंबरमध्ये बांधकामाचे दूषित पाणी सोडून सार्वजनिक आरोग्य धोक्यात आणणाऱ्या आणि अस्वच्छता पसरवणाऱ्या 'टार्गेट इन्फ्रा डेव्हलपर्स एल.एल.पी.' या बांधकाम व्यावसायिकावर २५ हजार रुपयांची कडक दंडात्मक कारवाई करण्यात आली आहे. महापालिकेच्या आरोग्य विभागाने गुरुवारी धडक मोहीम राबवून हा दंड वसूल केला असून, भविष्यात नियमांचे उल्लंघन करणाऱ्यांवर याहून कठोर कायदेशीर कारवाई केली जाईल, असा स्पष्ट इशारा दिला आहे.https://maharashtramirror.com/ Pune news

नेमकं प्रकरण काय?
प्रभाग क्रमांक २२ अंतर्गत १०६, लोहीयानगर येथील बांधकामाच्या ठिकाणी गेल्या काही दिवसांपासून नियम धाब्यावर बसवून काम सुरू असल्याचे स्थानिक नागरिकांच्या निदर्शनास आले होते. संबंधित बांधकाम व्यावसायिकाने योग्य विल्हेवाट न लावता, इमारतीच्या बांधकामाचे सांडपाणी थेट महानगरपालिकेच्या ड्रेनेज चेंबरमध्ये सोडले होते. यामुळे चेंबर तुंबून परिसरात दुर्गंधी पसरली होती तसेच नागरिकांच्या आरोग्याचा प्रश्न गंभीर बनला होता. या प्रकाराबाबत तक्रारी प्राप्त झाल्यानंतर महापालिकेच्या आरोग्य विभागाने तात्काळ या जागेची पाहणी केली आणि नियमांचा भंग झाल्याचे निष्पन्न झाले.https://maharashtramirror.com/ Pune News

सदर कारवाई पुणे महानगरपालिकेचे अतिरिक्त महापालिका आयुक्त (इ) प्रजित नायर, घनकचरा व्यवस्थापन विभागाचे उपआयुक्त संतोष वारुळे, परिमंडळ क्र. ५ चे उपआयुक्त माधव जगताप आणि कसबा पेठ क्षेत्रीय कार्यालयाचे महापालिका सहाय्यक आयुक्त तिमय्या जगले यांच्या प्रत्यक्ष आदेश आणि मार्गदर्शनाखाली पार पडली.

तक्रार प्राप्त होताच वरिष्ठ आरोग्य निरीक्षक राहुल राजगोळकर यांच्या नेतृत्वाखालील पथकाने दिनांक ९ ऑक्टोबर २०२६ रोजी संबंधित बांधकामाच्या ठिकाणी भेट देऊन पाहणी केली. अनधिकृतपणे पाणी ड्रेनेज लाईनमध्ये सोडल्याचा प्रकार समोर आल्यानंतर पथकाने जागेवरच २५,००० रुपयांच्या दंडाची पावती फाडून रक्कम वसूल केली. या धडक कारवाईच्या वेळी वरिष्ठ आरोग्य निरीक्षक राहुल राजगोळकर आणि आरोग्य निरीक्षक शिवाजी गायकवाड प्रत्यक्ष उपस्थित होते.

सार्वजनिक आरोग्याशी खेळल्यास थेट फौजदारी कारवाई!
शहर स्वच्छ ठेवण्यासाठी आणि सार्वजनिक आरोग्य अबाधित राखण्यासाठी महानगरपालिका प्रशासन सातत्याने विविध उपाययोजना करत आहे. असे असतानाही काही विकासक आणि नागरिक व्यावसायिक फायद्यासाठी नियमांची पायमल्ली करताना दिसतात. ड्रेनेज लाईनची क्षमता ठरावीक सांडपाण्यापुरती मर्यादित असते; त्यामध्ये बांधकामाचे गाळयुक्त पाणी किंवा कचरा सोडल्यास संपूर्ण लाईन ब्लॉक होण्याचा धोका असतो.

शहरात कुठेही अनधिकृतपणे कचरा टाकणे, अस्वच्छता पसरवणे किंवा सार्वजनिक ड्रेनेज लाईनचा गैरवापर करून आरोग्याला धोका निर्माण करणे गंभीर गुन्हा आहे. अशा बेजबाबदार घटकांवर यापुढेही कोणतीही गय न करता कडक कायदेशीर व दंडात्मक कारवाई सुरूच राहील. असे क्षेत्रीय कार्यालयाच्या अधिकाऱ्यांनी स्पष्ट केले.

लोहीयानगरमधील या कारवाईमुळे परिसरातील अनधिकृत कामे करणाऱ्या व्यावसायिकांचे धाबे दणाणले असून, नागरिकांनी या निर्णयाचे स्वागत केले आहे. शहरात कुठेही असा प्रकार आढळल्यास महापालिकेच्या आरोग्य विभागाकडे तक्रार करण्याचे आवाहनही प्रशासनाने केले आहे.