Ritu Tawade : महापौरांच्या घड्याळावरून सोशल मीडियावर 'राडा'! 1 कोटींचा रोलेक्स की काही हजारांचे मायकल कोर्से? रितू तावडेंनी मांडली खरी बाजू

Ritu Tawade Watch : रोलेक्स डेटोना' असल्याच्या दाव्याने रितू तावडे ट्रोल | "बदनामीचा जाणीवपूर्वक प्रयत्न" - महापौरांचा संताप | अफवा पसरवणाऱ्यांना दिले सडेतोड उत्तर

मुंबई :- मुंबईच्या महापौर रितू तावडे यांच्या एका फोटोने सध्या इंटरनेटवर चर्चांना उधाण आले आहे. महापौरांच्या मनगटावर दिसणारे सुवर्ण रंगाचे घड्याळ हे जगातील अत्यंत महागड्या ब्रँडपैकी एक असलेल्या 'रोलेक्स'चे (Rolex) असल्याचा दावा काही युजर्सनी केला. मात्र, या दाव्यातील हवा खुद्द महापौरांनीच काढून टाकली असून, हे घड्याळ रोलेक्स नसून दुसऱ्याच ब्रँडचे असल्याचे त्यांनी स्पष्ट केले आहे.

काय होता सोशल मीडियावरील दावा?

सोशल मीडियावर व्हायरल झालेल्या पोस्टमध्ये असा दावा करण्यात आला होता की, रितू तावडे यांनी ‘Rolex Yellow Gold Daytona’ हे मॉडेल परिधान केले आहे. या घड्याळाची किंमत आंतरराष्ट्रीय बाजारात 60 ते 70 लाख रुपये असून भारतात करांसह त्याची किंमत एक कोटी रुपयांच्या घरात जाते. या दाव्यानंतर "एका लोकप्रतिनिधीकडे इतके महागडे घड्याळ येते कुठून?" असे प्रश्न विचारत त्यांना ट्रोल करण्यात आले.

रितू तावडे यांचे स्पष्टीकरण: "ते रोलेक्स नाही!"

वाढता वाद पाहून महापौर रितू तावडे यांनी 'एक्स' (पूर्वीचे ट्विटर) वर पोस्ट करत आपली बाजू मांडली. त्यांनी या सर्व आरोपांचे खंडन करताना म्हटले की:

ब्रँडचे नाव: "माझ्या हातातील घड्याळ हे Michael Kors (मायकल कोर्से) कंपनीचे आहे, रोलेक्स डेटोना नाही."

किंमतीचा खुलासा: मायकल कोर्सेची घड्याळे साधारणपणे 15 ते 30 हजार रुपयांच्या दरम्यान असतात. त्यामुळे लाखांच्या किंवा कोटींच्या किंमतीचा प्रश्नच येत नाही.

बदनामीचा कट: "ही पोस्ट पूर्णपणे खोटी आणि दिशाभूल करणारी आहे. जाणीवपूर्वक बदनामी करण्यासाठी हा बेजबाबदारपणा केला जात आहे. मी अशा खोट्या आरोपांना भीक घालत नाही," असे त्यांनी ठणकावून सांगितले.