Delhi News : जंतरमंतरवर जाणाऱ्या 200 खासदारांचा ताफा रोखला; राहुल गांधींना दिल्ली पोलिसांकडून पुन्हा अटक, रस्त्यावरच मांडला ठिय्या!'

Delhi News :नवी दिल्ली :- मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी आक्रमक झालेल्या विरोधी पक्षांचे आंदोलन आता पूर्णपणे नियंत्रणाबाहेर गेले आहे. मंगळवारी दिवसभर चालेल्या आकाशवाणी भवनावरील नाट्यमय आंदोलनानंतर, आज पुन्हा एकदा 'इंडिया' (INDIA) आघाडीच्या सुमारे 200 खासदारांसह जंतरमंतर मैदानाकडे कूच करणाऱ्या काँग्रेस नेते राहुल गांधी यांना दिल्ली पोलिसांनी जंतरमंतरपासून अवघ्या 100 मीटर अंतरावर अडवून पुन्हा एकदा ताब्यात घेतले आहे.https://maharashtramirror.com/ Delhi News :

पोलीस प्रशासनाच्या या कारवाईनंतर संतापलेल्या राहुल गांधी यांनी रस्त्यावरच ठिय्या मांडला असून, "मुख्य निवडणूक आयुक्तांनी देशाची लोकशाही धोक्यात आणली असून त्यांचा राजीनामा घेतल्याशिवाय हे आंदोलन शांत होणार नाही," असा घणाघाती इशारा दिला आहे.

मिळालेल्या माहितीनुसार, मंगळवारी रात्री उशिरा सुटका झाल्यानंतर आज काँग्रेसचे राष्ट्रीय अध्यक्ष मल्लिकार्जुन खर्गे यांच्या अधिकृत निवासस्थानी 'इंडिया' आघाडीच्या प्रमुख नेत्यांची आणि खासदारांची तातडीची बैठक व स्नेहभोजनाचा कार्यक्रम पार पडला. या बैठकीनंतर रणनीती आखून विरोधी पक्षांचे जवळपास 200 खासदार तीन मोठ्या बसमध्ये बसून जंतरमंतर मैदानाकडे आंदोलनासाठी निघाले.

मात्र, खासदारांचा हा ताफा जंतरमंतर मैदानाजवळ पोहोचताच आधीच मोठा बंदोबस्त लावून बसलेल्या दिल्ली पोलिसांनी बस अडवल्या. पोलिसांनी सुरक्षेचे कारण देत खासदारांना बसमधून उतरण्यास व पुढे जाण्यास बंदी घातली.

पोलिसांनी रस्ता अडवल्यानंतर राहुल गांधी यांच्यासह विरोधी पक्षाच्या सर्व खासदारांनी बसमधून खाली उतरून पोलिसांच्या बॅरिकेड्ससमोरच ठिय्या आंदोलन सुरू केले.

आक्रमक घोषणाबाजी: खासदारांनी भाजप सरकार, दिल्ली पोलीस आणि मुख्य निवडणूक आयुक्त ज्ञानेश कुमार यांच्याविरोधात जोरदार घोषणाबाजी केली.

लोकशाही वाचवण्याची लढाई: राहुल गांधी म्हणाले, "मुख्य निवडणूक आयुक्त निष्पक्ष राहिलेले नाहीत. ते लोकशाहीचा गळा घोटत आहेत. खासदारांना शांततेच्या मार्गाने आंदोलन करण्याचा आणि आपली मागणी मांडण्याचा घटनात्मक अधिकार आहे, मात्र सरकार पोलिसांच्या बळावर आवाज दाबत आहे."

मंगळवारी राहुल गांधी आणि प्रियंका गांधी यांनी आकाशवाणी भवनात प्रवेश केल्यानंतर तब्बल 8 तास ठिय्या आंदोलन केले होते, ज्यानंतर रात्री त्यांना ताब्यात घेऊन उशिरा सोडण्यात आले होते. त्यानंतर अवघ्या काही तासांतच आज पुन्हा एकदा जंतरमंतरवर 200 खासदारांना रोखून राहुल गांधींना ताब्यात घेण्यात आल्यामुळे केंद्र सरकार आणि विरोधकांमधील संघर्ष विकोपाला पोहोचला आहे.

सध्या जंतरमंतर आणि ल्युटियन्स दिल्लीच्या संपूर्ण परिसराला छावणीचे रूप प्राप्त झाले असून, पोलिसांचा प्रचंड फौजफाटा तैनात करण्यात आला आहे. राहुल गांधींना ताब्यात घेतल्यानंतर आता विरोधी पक्ष पुढे कोणती भूमिका घेतात, याकडे संपूर्ण देशाचे लक्ष लागले आहे.