Maharashtra Politics : रणधुमाळी सुरू! स्थानिक स्वराज्य संस्था निवडणुकीसाठी भाजपने स्टार प्रचारकांची यादी केली जाहीर

•BJP Star Campaigners List : 2 डिसेंबरला मतदान, 3 डिसेंबरला मतमोजणी; देवेंद्र फडणवीस, नितीन गडकरींसह दिग्गज मैदानात

मुंबई :- राज्य निवडणूक आयोगाने स्थानिक स्वराज्य संस्थांच्या निवडणुकीची घोषणा केल्यानंतर आता राजकीय पक्षांनी आपली रणनीती आखण्यास सुरुवात केली आहे. जाहीर करण्यात आलेल्या कार्यक्रमानुसार, राज्यात 2 डिसेंबर रोजी नगरपंचायत आणि नगरपरिषद निवडणुकीसाठी मतदान होणार असून, 3 डिसेंबर रोजी मतमोजणी पार पडेल. या निवडणुकीच्या पार्श्वभूमीवर भाजपने आपल्या स्टार प्रचारकांची यादी जाहीर केली आहे.

भाजपच्या स्टार प्रचारकांची फौज

स्थानिक स्वराज्य संस्था निवडणुकीसाठी भाजपने आपल्या दिग्गज नेत्यांना प्रचारात उतरवण्याची तयारी केली आहे. या स्टार प्रचारकांमध्ये मुख्यमंत्री देवेंद्र फडणवीस, केंद्रीय मंत्री नितीन गडकरी, पक्षाचे प्रदेशाध्यक्ष रवींद्र चव्हाण, चंद्रशेखर बावनकुळे, विनोद तावडे, पीयूष गोयल, नारायण राणे, सुधीर मुनगंटीवार, चंद्रकांत पाटील, रावसाहेब दानवे, आशिष शेलार, मुरलीधर मोहोळ, राधाकृष्ण विखे पाटील, पंकजा मुंडे, गिरीश महाजन, गणेश नाईक, जयकुमार रावल, आणि शिवेंद्रराजे भोसले या प्रमुख नेत्यांचा समावेश आहे.

राजकीय महत्त्व

विधानसभा निवडणुकीत राज्यात महायुतीला मोठे यश मिळाल्यानंतर होणारी ही पहिलीच निवडणूक आहे, त्यामुळे ही निवडणूक सर्वच पक्षांसाठी प्रतिष्ठेची बनली आहे. या निवडणुकीनंतर लगेचच महापालिकांच्या निवडणुका होणार असल्याने, हे निकाल राज्याच्या भविष्यातील राजकीय दिशा ठरवण्यासाठी महत्त्वाचे ठरतील.

महायुतीत 'पक्षांतर' वाद

समोर आलेल्या माहितीनुसार, राज्यात काही ठिकाणी भाजप ही निवडणूक महायुतीमध्ये लढणार आहे, तर काही ठिकाणी स्वबळावर लढणार आहे. निवडणुकीपूर्वी पक्षांतराला वेग आला असून, महायुतीमधीलच घटक पक्ष असलेल्या शिवसेना (शिंदे गट) आणि राष्ट्रवादी (अजित पवार गट) मधील अनेक नेते भाजपात प्रवेश करताना दिसत आहेत. यावरून शिवसेना (शिंदे गट) चे खासदार नरेश मस्के यांनी जाहीर नाराजी व्यक्त केली होती, तरीही भाजपत पक्षप्रवेश सुरूच आहेत.