IND vs WI World Cup 2026 : संजू सॅमसनचा 'रुद्र' अवतार! वेस्ट इंडिजला धूळ चारत भारत सेमी फायनलमध्ये; निर्णायक सामन्यात 97 धावांची वादळी खेळी

•196 धावांच्या विशाल आव्हानाचा पाठलाग यशस्वी | संजू सॅमसनचे नाबाद 97 धावांचे 'सोनं' | सूर्यकुमार, अभिषेक शर्मा स्वस्तात बाद झाल्यानंतर संजूने सावरला डाव

IND vs WI World Cup 2026 :- आयसीसी टी-20 वर्ल्डकप-2026 मधील अत्यंत महत्त्वाच्या आणि अघोषित 'क्वार्टर फायनल' सामन्यात भारताने यजमान वेस्ट इंडिजचा पराभव केला आहे. 196 धावांचे डोंगराएवढे आव्हान समोर असताना संजू सॅमसनने खेळपट्टीवर नांगर टाकत भारताला विजय मिळवून दिला. या विजयामुळे भारतीय संघाने दिमाखात सेमी फायनलमध्ये प्रवेश केला असून वेस्ट इंडिजचे स्पर्धेतील आव्हान संपुष्टात आले आहे.

संजू सॅमसन: टीकेला बॅटने दिले उत्तर

या स्पर्धेत संजू सॅमसनला प्लेइंग इलेव्हनमध्ये स्थान मिळेल की नाही, याबाबत साशंकता होती. मात्र, आज जेव्हा संघाला त्याची सर्वाधिक गरज होती, तेव्हा संजूने आपल्या कारकिर्दीतील सर्वोत्तम खेळींपैकी एक साकारली.

खेळीचा तपशील: सलामीला आलेल्या संजूने अवघ्या 50 चेंडूत नाबाद 97 धावा कुटल्या.

फटकेबाजी: आपल्या या खेळीत त्याने 12 चौकार आणि 4 उत्तुंग षटकार मारले. शतकापासून अवघ्या 3 धावा दूर असतानाही त्याने वैयक्तिक विक्रमापेक्षा संघाच्या विजयाला प्राधान्य दिले.

भारतीय डावाचा चढ-उतार
196 धावांचा पाठलाग करताना भारताची सुरुवात अत्यंत खराब झाली होती. फॉर्मात असलेला अभिषेक शर्मा (10) आणि इशान किशन (10) स्वस्तात माघारी परतले. कर्णधार सूर्यकुमार यादवही (18) मोठी खेळी करण्यात अपयशी ठरला. एकवेळ भारत संकटात सापडला होता, पण तिलक वर्माने (27) संजूला मोलाची साथ दिली. त्यानंतर हार्दिक पांड्याने (17) फटकेबाजी करत धावगती कायम ठेवली. मात्र, दुसऱ्या बाजूने संजू सॅमसन शेवटपर्यंत खंबीरपणे उभा राहिला आणि विजय खेचून आणला.

वेस्ट इंडिजची फलंदाजी धावसंख्येचा डोंगर

तत्पूर्वी, नाणेफेक हारल्यानंतर प्रथम फलंदाजी करताना वेस्ट इंडिजने निर्धारित 20 षटकात 4 बाद 195 धावांचा डोंगर उभा केला होता.

सलामीची भागीदारी: शे होप (32) आणि रोस्टन चेस (40) यांनी 68 धावांची सलामी देत भारतीय गोलंदाजांवर दबाव निर्माण केला होता.

शेवटची फटकेबाजी: कर्णधार रोमन पॉवेल (नाबाद 34) आणि जेसन होल्डर (नाबाद 37) यांनी अखेरच्या षटकांत तुफान फटकेबाजी करत धावसंख्या 190 च्या पार नेली होती.