सूर्यकुमार यादवची तुफानी खेळी! १५ चेंडूंत अर्धशतक, २१ चेंडूंत नाबाद ६० धावा; मुंबईचा दणदणीत विजय

कोलकाता : भारतीय फलंदाज सूर्यकुमार यादवने सय्यद मुश्ताक अली ट्रॉफी २०२६-२७ स्पर्धेत आपल्या आक्रमक फलंदाजीची झलक दाखवली. हैदराबादविरुद्धच्या सामन्यात सूर्यकुमारने अवघ्या २१ चेंडूंत नाबाद ६० धावांची तुफानी खेळी केली. त्याच्या या खेळीच्या जोरावर मुंबईने हैदराबादचा सात विकेटने पराभव करत स्पर्धेच्या पहिल्याच सामन्यात दणदणीत विजय मिळवला. या सामन्यात हैदराबादने प्रथम फलंदाजी करताना २० षटकांत सर्वबाद १७२ धावा केल्या. हैदराबादकडून अभिरथ रेड्डीने २४ चेंडूंत ३५, तर कोडिमेला हिमतेजाने १६ चेंडूंत २५ धावा केल्या. मुंबईकडून मॅक्सवेल स्वामिनाथनने तीन, तर शिवम दुबेने दोन बळी घेतले.

विजयासाठी १७३ धावांचे लक्ष्य घेऊन मैदानात उतरलेल्या मुंबईने आक्रमक सुरुवात केली. अंगकृष रघुवंशीने १३ चेंडूंत २७, तर हार्दिक तमोरेने १६ चेंडूंत २२ धावा केल्या. त्यानंतर सूर्यकुमार यादव आणि मुशीर खान यांनी हैदराबादच्या गोलंदाजांवर जोरदार हल्ला चढवला. सूर्यकुमारने अवघ्या १५ चेंडूंत अर्धशतक पूर्ण केले. त्याने आपल्या २१ चेंडूंच्या खेळीत सहा चौकार आणि पाच षटकार ठोकत नाबाद ६० धावा केल्या. दुसऱ्या बाजूला मुशीर खाननेही २४ चेंडूंत ५१ धावांची आक्रमक खेळी केली. त्याने सहा चौकार आणि तीन षटकार लगावले. अखेर शिवम दुबेने षटकार ठोकत मुंबईच्या विजयावर शिक्कामोर्तब केले. मुंबईने अवघ्या १३.१ षटकांत तीन गडी गमावून १७४ धावा करत सात विकेटने सामना जिंकला. सूर्यकुमारच्या या धडाकेबाज खेळीमुळे त्याच्या स्पर्धेतील पुनरागमनाची जोरदार चर्चा सुरू झाली आहे.

सामन्याचा निकाल: हैदराबाद १७२/१० (२० षटके); मुंबई १७४/३ (१३.१ षटके). मुंबई सात विकेटने विजयी.