पुण्यात थंडीचा जोर काहीसा ओसरला; किमान तापमानात वाढ, पुढील काही दिवस हवामान कोरडे राहणार
पहाटेचा गारठा कायम; दुपारी उन्हाचा चटका जाणवणार,
2 મિનિટ વાંચનઅપડેટ:

पुणे, महाराष्ट्र मिरर - मागील काही दिवसांपासून पुणे शहर आणि परिसरात जाणवणाऱ्या थंडीचा जोर आता काहीसा कमी होऊ लागला आहे. किमान तापमानात हळूहळू वाढ होत असून, त्यामुळे पुणेकरांना थंडीपासून काहीसा दिलासा मिळत आहे. मात्र, पहाटे आणि रात्रीच्या वेळी गारठा कायम आहे. भारतीय हवामानशास्त्र विभागाच्या (IMD) नोंदीनुसार, १८ नोव्हेंबर रोजी शिवाजीनगर येथील किमान तापमान १४.३ अंश सेल्सिअस नोंदवण्यात आले.
हवामान विभागाच्या अंदाजानुसार, १९ नोव्हेंबर रोजी पुणे शहरातील किमान तापमान १४ अंश, तर कमाल तापमान ३१ अंश सेल्सिअस राहण्याची शक्यता आहे. २० नोव्हेंबरपासून किमान तापमानात हळूहळू वाढ होऊन ते १५ ते १७ अंशांपर्यंत जाण्याचा अंदाज आहे. तर कमाल तापमान २८ ते ३१ अंशांच्या दरम्यान राहणार आहे.
दरम्यान, पुढील काही दिवस पुणे आणि परिसरात आकाश मुख्यतः निरभ्र राहण्याचा अंदाज असून, पावसाची शक्यता कमी आहे. २० व २१ तारखेला वाऱ्याचा वेग वाढण्याची शक्यता असून २१ नोव्हेंबरनंतर दुपारच्या सुमारास अंशतः ढगाळ वातावरण निर्माण होऊ शकते.
चक्रीवादळाचा पुण्यावर थेट परिणाम नाही
दरम्यान, बंगालच्या उपसागरात निर्माण झालेल्या ‘अक्वान’ चक्रीवादळामुळे देशाच्या पूर्व किनारपट्टीवरील काही राज्यांना मुसळधार पावसाचा इशारा देण्यात आला आहे. हे चक्रीवादळ २० नोव्हेंबरच्या सुमारास आंध्र प्रदेशच्या किनारपट्टीवर धडकण्याची शक्यता भारतीय हवामानशास्त्र विभागाने वर्तवली आहे. मात्र, या चक्रीवादळाचा पुणे शहर आणि पश्चिम महाराष्ट्रावर थेट परिणाम होण्याची शक्यता सध्या नाही. पुणे शहरात पुढील काही दिवस हवामान प्रामुख्याने कोरडे राहणार असून, तापमानात मोठे बदल अपेक्षित नाहीत.

મહારાષ્ટ્ર મિરર
