कुस्तीचा थरार: हर्षवर्धन सदगीर दुसऱ्यांदा 'महाराष्ट्र केसरी'! अंतिम लढतीत महेंद्र गायकवाडवर मात

Maharashtra Kesari Final : पुण्याच्या वाघोलीत रंगला मानाच्या गदेचा संग्राम; 4-3 च्या फरकाने विजय मिळवत हर्षवर्धन ठरला सातवा 'डबल महाराष्ट्र केसरी'

पुणे :- पुण्यातील वाघोली (ता. हवेली) येथे आयोजित 67 व्या महाराष्ट्र केसरी कुस्ती स्पर्धेचा अंतिम निकाल जाहीर झाला असून, नाशिकच्या हर्षवर्धन सदगीर याने इतिहास रचला आहे. अटीतटीच्या झालेल्या अंतिम सामन्यात हर्षवर्धनने सोलापूरच्या महेंद्र गायकवाड याचा 4-3 अशा गुणफरकाने पराभव केला. या विजयासह हर्षवर्धन सदगीर हा महाराष्ट्राच्या कुस्ती इतिहासातील सातवा 'डबल महाराष्ट्र केसरी' ठरला आहे. Maharashtra Kesari Final Latest News

अंतिम लढतीचा चित्तथरारक प्रवास

महाराष्ट्र केसरीच्या किताबासाठी झालेल्या या लढतीत पहिल्यापासूनच दोन्ही पैलवानांनी सावध पवित्रा घेतला होता:

पहिला हाफ: सुरुवातीला महेंद्र गायकवाड याने 1 गुण मिळवत आघाडी घेतली होती, मात्र हर्षवर्धनने चपळाईने 1 गुण वसूल करत बरोबरी साधली. पहिला हाफ 1-1 अशा बरोबरीत सुटला.

दुसरा हाफ: दुसऱ्या सत्रात महेंद्रला 'ॲक्टिव्हिटी टास्क' देण्यात आला, मात्र त्यात त्याला गुण मिळवता आला नाही. याचा फायदा हर्षवर्धनला मिळाला आणि त्याने सलग गुण घेत 4-1 अशी भक्कम आघाडी घेतली.

शेवटचे क्षण: लढतीच्या शेवटच्या टप्प्यात महेंद्रने जोरदार पुनरागमन करत दोन गुण मिळवले, मात्र वेळ संपली तेव्हा धावफलक 4-3 असा हर्षवर्धनच्या बाजूने होता.

विभागीय अंतिम फेऱ्यांचा निकाल
अंतिम फेरीत पोहोचण्यापूर्वी दोन्ही पैलवानांनी आपापल्या विभागात वर्चस्व गाजवले होते.

1.गादी (मॅट) विभाग: नाशिकच्या हर्षवर्धन सदगीर याने सोलापूर शहराच्या जय पाटील याचा 10-0 असा एकतर्फी पराभव करून अंतिम फेरीत धडक मारली होती.

2.माती विभाग: सोलापूरच्या महेंद्र गायकवाड याने माती विभागाच्या फायनलमध्ये प्रबळ दावेदार सिकंदर शेख याला 3-0 असे पराभूत करून खळबळ उडवून दिली होती.

सातवा डबल महाराष्ट्र केसरी

हर्षवर्धन सदगीरने यापूर्वी 2020 मध्ये बालेवाडी येथे झालेल्या स्पर्धेत महाराष्ट्र केसरीचा किताब पटकावला होता. आता 2026 मध्ये पुन्हा एकदा गदा उंचावून त्याने 'डबल महाराष्ट्र केसरी' होण्याचा मान मिळवला आहे. या विजयानंतर वाघोलीतील कुस्ती मैदानात गुलालाची उधळण करण्यात आली असून नाशिकमध्ये उत्साहाचे वातावरण आहे.