लोणीकाळभोरमधील महिलेला लुबाडले १६ लाखांना

गुंतवणुकीवर भरघोस परताव्याचे आमिष दाखवून विश्वास संपादन; दोघांविरुद्ध गुन्हा दाखल

पुणे: कंपनीत गुंतवणूक केल्यास आकर्षक परतावा मिळेल, असे आमिष दाखवत एका ४५ वर्षीय महिलेची तब्बल १६ लाख रुपयांची आर्थिक फसवणूक केल्याचा प्रकार लोणीकाळभोर परिसरात उघडकीस आला आहे. या प्रकरणी दोन अज्ञात इसमांविरुद्ध लोणीकाळभोर पोलीस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, लोणीकाळभोर येथील कुशलवाटिका परिसरात राहणाऱ्या ४५ वर्षीय महिलेशी आरोपींनी संपर्क साधला होता. एका नामांकित कंपनीत गुंतवणूक केल्यास अल्पावधीत मोठा आर्थिक परतावा मिळेल, असे सांगून त्यांनी फिर्यादीचा विश्वास संपादन केला.

आरोपींनी विविध आश्वासने देत महिलेला गुंतवणुकीस प्रवृत्त केले. त्यानुसार फिर्यादीने वेळोवेळी मोठी रक्कम संबंधितांकडे दिली. मात्र गुंतवणुकीवरील परतावा देण्याचे आश्वासन पूर्ण न करता आरोपींनी तब्बल १६ लाख रुपये स्वतःकडेच ठेवून तिची आर्थिक फसवणूक केली.

फसवणुकीचा प्रकार लक्षात आल्यानंतर महिलेने लोणीकाळभोर पोलीस ठाण्यात तक्रार दाखल केली. प्राथमिक तपासात आरोपींनी बनावट आश्वासने देऊन आर्थिक लाभाच्या उद्देशाने हा प्रकार केल्याचे समोर आले आहे.

या प्रकरणी लोणीकाळभोर पोलीस ठाण्यात गुन्हा नोंदविण्यात आला असून आरोपींचा शोध सुरू आहे. पोलिसांकडून आर्थिक व्यवहारांची कागदपत्रे आणि संबंधित खात्यांची माहिती तपासली जात आहे.