Thane Upvas News : उपवन तलावात १० वर्षीय मुलाचा दुर्दैवी बुडून मृत्यू

ठाणे : उपवन तलाव, पाळाई देवी मंदिराजवळ एका १० वर्षीय मुलाचा पाण्याचा अंदाज न आल्याने बुडून मृत्यू झाल्याची दुर्दैवी घटना रविवारी दुपारी घडली. मृत मुलाचे नाव कु. राज भास्कर चाबूकस्वार (वय १० वर्षे, राहणार – पाईपलाईन, भीमनगर, वर्तकनगर, ठाणे) असे आहे. Thane Upavan Latest News

मिळालेल्या माहितीनुसार, तीन मुले उपवन तलावाच्या काठावर फिरण्यासाठी गेली असता त्यातील राज तलावात पोहण्यासाठी उतरला. मात्र, पाण्याचा अंदाज न आल्याने तो खोल पाण्यात गेला आणि बुडाला.

घटनेची माहिती मिळताच वर्तकनगर पोलीस, ठाणे महापालिकेचे आपत्ती व्यवस्थापन पथक, ठाणे आपत्ती प्रतिसाद दल (TDRF), अग्निशमन दल घटनास्थळी दाखल झाले. संयुक्त बचावकार्यातून राजला तलावातून बाहेर काढण्यात आले. त्यानंतर रुग्णवाहिकेतून जिल्हा शासकीय रुग्णालय, ठाणे येथे नेण्यात आले. मात्र तेथील डॉक्टरांनी त्याला मृत घोषित केले.

या घटनेमुळे परिसरात हळहळ व्यक्त होत असून, वर्तकनगर पोलिसांनी पुढील तपास सुरू केला आहे