Thane Cyber Crime News : ठाण्यात सायबर लुटमार! - 85 लाखांची फसवणूक; बनावट ॲपवर '6 कोटी नफ्याचे' अमिष दाखवून सेवानिवृत्ताची आयुष्यभराची कमाई लुटली

Thane Latest Cyber Crime News : फेसबुकवर ट्रेडिंग संदेशाद्वारे जाळ्यात ओढले; नफा काढण्यासाठी पुन्हा 1.30 कोटींची मागणी होताच फसवणूक उघड; कासारवडवली पोलीस ठाण्यात गुन्हा दाखल

ठाणे :- शेअर बाजारात आकर्षक आणि जादा परतावा मिळवून देण्याचे आमिष दाखवून सायबर गुन्हेगार बनावट मोबाईल ॲप्सच्या माध्यमातून ज्येष्ठ नागरिकांना लक्ष्य करत असल्याचा धक्कादायक प्रकार ठाण्यात समोर आला आहे. घोडबंदर परिसरात राहणाऱ्या एका 58 वर्षीय सेवानिवृत्त व्यक्तीला फसवणूक करणाऱ्यांनी तब्बल 85 लाख 37 हजार 413 रुपये गमावण्यास भाग पाडले आहे. Thane Latest Crime News

घोडबंदर येथील कासारवडवली भागात पत्नीसह राहणाऱ्या या सेवानिवृत्त व्यक्तीला दोन महिन्यांपूर्वी त्यांच्या फेसबुक खात्यावर ट्रेडिंग माहिती देणारा संदेश प्राप्त झाला. त्या संदेशाच्या आधारे त्यांनी मोबाइल क्रमांक मिळवून घेतला आणि त्यांना एका व्हॉट्सॲप समूहामध्ये जोडण्यात आले. या समूहात त्यांना शेअर बाजारात गुंतवणूक करण्यासाठी एक लिंक पाठवण्यात आली. या लिंकवर क्लिक केल्यावर त्यांच्या मोबाईलमध्ये एक बनावट ट्रेडिंग ॲप्लिकेशन सुरू झाले. Thane Latest Cyber Crime News

या ॲपवर विश्वास ठेवून सेवानिवृत्त व्यक्तीने त्यांची वैयक्तिक माहिती भरली आणि त्यांची आयुष्यभराची जमापुंजी असलेले 85 लाखांहून अधिक रुपये टप्प्याटप्प्याने ऑनलाइन पद्धतीने विविध बँक खात्यांत जमा केले. काही दिवसांनी या बनावट ॲपवर त्यांना त्यांच्या गुंतवणुकीवर नफा म्हणून 6 कोटी 51 लाख 52 हजार 380 रुपये इतकी मोठी रक्कम दाखवण्यात आली. मात्र, जेव्हा नफा काढण्याची वेळ आली, तेव्हा गुन्हेगारांनी नफा देण्यासाठी पुन्हा 1 कोटी 30 लाख रुपये भरण्यास सांगितले. नफा काढण्यासाठी शुल्क कशासाठी, असा संशय सेवानिवृत्त व्यक्तीला आल्यानंतर त्यांना आपली फसवणूक झाल्याचे लक्षात आले.

या घटनेनंतर त्यांनी तात्काळ 1930 या मदत क्रमांकावर संपर्क साधून माहिती दिली आणि कासारवडवली पोलीस ठाण्यात तक्रार दाखल केली. पोलीस या प्रकरणाचा अधिक तपास करत आहेत.