Sanjay Raut : मुख्यमंत्र्यांच्या 'चिनी फंडिंग'च्या आरोपावर संजय राऊतांचे प्रत्युत्तर; म्हणाले, "आधी स्वतःचे बघा, चीन देशात घुसलाय…"

•मुख्यमंत्री देवेंद्र फडणवीसांच्या टीकेवर खासदार संजय राऊतांचा तीव्र संताप; सीमेवरील चीनच्या घुसखोरीवर बोलण्याऐवजी विरोधकांवर बिनबुडाचे आरोप केले जात असल्याचा घणाघात

मुंबई :- ठाण्यात पार पडलेल्या 'लोकतंत्र बचाव' यात्रेत मुख्यमंत्री देवेंद्र फडणवीस यांनी राहुल गांधी आणि विरोधकांवर चिनी निधी (फंडिंग) मिळवल्याचा आरोप केला होता. या आरोपांचा शिवसेना (उद्धव बाळासाहेब ठाकरे) पक्षाचे खासदार संजय राऊत यांनी अत्यंत आक्रमक आणि तीव्र शब्दांत समाचार घेतला आहे. प्रसारमाध्यमांशी बोलताना संजय राऊत यांनी मुख्यमंत्र्यांच्या विधानाचा धिक्कार करत, सत्ताधारी आपल्या अपयशावर पडदा पाडण्यासाठी आणि मूळ प्रश्नांवरून जनतेचे लक्ष विचलित करण्यासाठी अशा प्रकारची हास्यास्पद विधाने करत असल्याचा दावा केला.

"देशाच्या सीमेवर चीन घुसलाय, त्यावर सत्ताधारी गप्प का?"

संजय राऊत यांनी केंद्र सरकार आणि राज्याच्या मुख्यमंत्र्यांना थेट आव्हान देत विचारणा केली की, लडाख आणि अरुणाचल प्रदेशच्या सीमेवर चीनने प्रत्यक्ष अतिक्रमण केले आहे; परंतु त्यावर बोलायची हिंमत सत्ताधाऱ्यांकडे नाही. "ज्या चीनने आपल्या भूभागात घुसखोरी केली आहे, त्या चीनला देशातून बाहेर घालवण्याचे सोडून विरोधकांना चिनी निधी मिळत असल्याचा जावईशोध लावला जात आहे," असे सांगत राऊत यांनी सडकून टीका केली. चीनच्या मुद्द्यावर बोलण्याऐवजी भाजप विरोधकांना बदनाम करण्याचे षडयंत्र रचत असल्याचा टोला त्यांनी लगावला.

दिल्लीतील महामोर्चाच्या यशाने सत्ताधाऱ्यांमध्ये अस्वस्थता

दिल्लीतील रामलीला मैदानावर 'इंडिया' (INDIA) आघाडीच्या वतीने आयोजित करण्यात आलेल्या महारॅलीला जनतेचा अथांग पाठिंबा मिळाला आहे. मुख्य निवडणूक आयुक्तांच्या कारभाराविरोधात आणि लोकशाहीच्या रक्षणासाठी 20 हून अधिक विरोधी पक्ष एकत्र आल्यामुळे केंद्र आणि राज्यातील सत्ताधाऱ्यांच्या पायाखालची जमीन सरकली आहे, असा दावा राऊत यांनी केला. विरोधकांची एकजूट आणि वाढता जनपाठिंबा पाहूनच घाबरलेले सत्ताधारी अशा प्रकारे बिनबुडाचे आणि बिनबुडाचे आरोप करून दिशाभूल करत आहेत, असेही त्यांनी नमूद केले.

हेही वाचा: विधान परिषद निकालानंतर राजकारणात खळबळ; राष्ट्रवादीच्या बड्या नेत्यांची दिल्लीत केंद्रीय गृहमंत्री अमित शाह यांच्याशी भेट