Pune News : पालखी सोहळ्यानिमित्त पुणे मेट्रोची विशेष सेवा

दर सहा मिनिटांनी धावणार मेट्रो फेऱ्या

पुणे, महाराष्ट्र मिरर प्रतिनिधी : आषाढी एकादशी पालखी सोहळ्यानिमित्त पुणे शहरात लाखो वारकरी आणि भाविकांची गर्दी होत असल्याच्या पार्श्वभूमीवर पुणे मेट्रोने प्रवाशांच्या सुविधेसाठी विशेष सेवा सुरू केली आहे. पालखी सोहळ्याच्या निमित्ताने वारकरी, भाविक आणि पुणेकर नागरिकांचा प्रवास अधिक सुलभ, सुरक्षित आणि आरामदायी व्हावा, यासाठी गुरुवारपासून (दि. ९) सकाळी ८ ते रात्री ८ वाजल्यापर्यंत पुणे मेट्रोची सेवा दर सहा मिनिटांनी उपलब्ध करून देण्यात आली आहे.Pune News

पालखीच्या काळात रस्त्यांवरील संभाव्य वाहतूक कोंडी टाळण्यासाठी आणि प्रवाशांना विनाअडथळा प्रवास करता यावा, यासाठी मेट्रो प्रशासनाकडून हा निर्णय घेण्यात आला आहे.
पालखी सोहळ्यादरम्यान पुणे शहरातील मुख्य रस्त्यांवर मोठ्या प्रमाणावर भाविकांची गर्दी होते. अशा वेळी वेळेची बचत करणारा, विश्वासार्ह आणि पर्यावरणपूरक प्रवासाचा मार्ग म्हणून पुणे मेट्रो हा नागरिकांसाठी एक उत्तम आणि जलद पर्याय ठरणार आहे. नेहमीच्या वेळेपेक्षा मेट्रोच्या फेऱ्यांची वारंवारता लक्षणीयरीत्या वाढवण्यात आल्यामुळे भाविकांना स्थानकांवर जास्त वेळ वाट पाहावी लागणार नाही आणि गर्दीचा ताणही कमी होण्यास मोठी मदत होणार आहे. प्रवाशांच्या सुलभ प्रवासासाठी स्थानक परिसरातील सुरक्षा व्यवस्था आणि तिकिट खिडक्यांवर प्रवाशांची कोंडी होणार नाही, याची विशेष दक्षता घेण्यात आली आहे.Pune News

मेट्रो प्रशासनाने सर्व भाविक आणि पुणेकरांना प्रवास करताना मेट्रो स्थानकांवरील विविध सूचनांचे व उद्घोषणांचे काटेकोर पालन करण्याचे आवाहन केले आहे. तसेच गर्दीच्या वेळी सहप्रवाशांच्या सोयीची काळजी घेत सुरक्षित प्रवासाचा लाभ घ्यावा, असे प्रशासनाने स्पष्ट केले आहे. गर्दी नियंत्रित करण्यासाठी आणि प्रवाशांना योग्य मार्गदर्शन करण्यासाठी स्थानकांवर अतिरिक्त सुरक्षा रक्षक आणि स्वयंसेवक तैनात करण्यात आले असून, प्रवाशांनी प्रशासनाला सहकार्य करावे अशी विनंती करण्यात आली आहे.

Pune News