Navi Mumbai News : तुर्भे एमआयडीसीत भीषण आग! 'रेशमा केमिकल्स' कंपनीला आगीचं जबर नुकसान

Navi Mumbai MIDC Fire News : सकाळच्या सुमारास लागलेल्या आगीत ज्वालाग्राही रसायनांमुळे आगीने घेतलं उग्र रूप

नवी मुंबई :- तुर्भे एमआयडीसीतील इंदिरानगर परिसरात असलेल्या ‘रेशमा ऑर्गेनिक केमिकल्स’ या रासायनिक उत्पादन करणाऱ्या कंपनीला आज पहाटे सकाळी 4.37 वाजता अचानक आग लागली. रासायनिक साठा आणि ज्वलनशील पदार्थ मोठ्या प्रमाणावर असल्याने काही क्षणातच आगीने रौद्र रूप धारण केले.

ही कंपनी भूखंड क्रमांक D-61 वर असून, तिथे असलेल्या प्लांटमध्ये स्फोटक आणि ज्वालाग्राही रसायनांचा मोठा साठा होता. नेरुळ अग्निशमन दल पाच मिनिटांत घटनास्थळी दाखल झालं आणि आगीवर नियंत्रण मिळवण्याचे प्रयत्न सुरू झाले. मात्र, आग इतकी प्रचंड होती की लगेचच वाशी आणि सीबीडी बेलापूर येथूनही अग्निशमन गाड्या पाचारण करण्यात आल्या.

सध्या आगीवर नियंत्रण मिळवण्यासाठी शर्थीचे प्रयत्न सुरू आहेत. आग कशामुळे लागली, याचा नेमका कारण अजून अस्पष्ट आहे. तसेच, हानीचे अंदाजे प्रमाण अद्याप अधिकृतरीत्या जाहीर करण्यात आलेले नाही.

सुदैवाने, या आगीत कुठलीही जीवितहानी झाल्याची नोंद अद्यापपर्यंत झालेली नाही, अशी माहिती वाशी अग्निशमन विभागाने दिली. मात्र, रासायनिक संयंत्र असल्यामुळे परिसरात धुराचे प्रमाण वाढले असून आसपासच्या परिसरातील रहिवाशांमध्ये भीतीचे वातावरण आहे.

अग्निशमन दलाच्या अंदाजानुसार, आगीवर पूर्ण नियंत्रण मिळवायला किमान दोन तास लागतील. दरम्यान, अग्निशमन अधिकाऱ्यांकडून कंपनीतील कर्मचाऱ्यांची सुरक्षा आणि आगीची चौकशी सुरू करण्यात आली आहे.