Mumbai News : मुंबईत दरडीचा थरार! मध्यरात्री डोंगर कोसळून एकाच कुटुंबातील पिता-पुत्रीचा दुर्दैवी अंत
• मुंबईत सुरू असलेल्या मुसळधार पावसामुळे नैसर्गिक आपत्त्यांचे संकट !
1 min read
• मुंबईत सुरू असलेल्या मुसळधार पावसामुळे नैसर्गिक आपत्त्यांचे संकट !
मुंबई, विक्रोळी :- शुक्रवारी रात्रीच्या भयाण काळोखात आणि जोरदार पावसाच्या सरींमध्ये विक्रोळीमधील पार्कसाईट परिसरात एक काळजाला हेलावून टाकणारी घटना घडली. मध्यरात्री 2 वाजण्याच्या सुमारास, गाढ झोपेत असलेल्या एका कुटुंबावर अचानक डोंगराचा भाग कोसळला. यात एकाच कुटुंबातील बाप-लेकीचा जागीच दुर्दैवी मृत्यू झाला.
काय घडलं नेमकं?
पार्कसाईटच्या वर्षा नगरमधील मिश्रा कुटुंबिय नेहमीप्रमाणे झोपले असताना, त्यांच्या घराशेजारील डोंगराचा मोठा भाग माती, दगड आणि चिखलासह त्यांच्या घरावर कोसळला. क्षणात होत्याचे नव्हते झाले. काही कळायच्या आतच संपूर्ण घर मातीच्या ढिगाऱ्याखाली दबले गेले. या दुर्घटनेत 50 वर्षीय सुरेशचंद्र मिश्रा आणि त्यांची 20 वर्षांची मुलगी शालू मिश्रा यांचा मृत्यू झाला. या घटनेने परिसरात एकच हाहाकार माजला.
बचावकार्य आणि पुढील तपास
घटनेची माहिती मिळताच शेजाऱ्यांनी आरडाओरड करत मदत मिळवण्याचा प्रयत्न केला. काही वेळातच अग्निशमन दल आणि महापालिका कर्मचाऱ्यांनी घटनास्थळी धाव घेतली आणि तातडीने बचावकार्य सुरू केले. मातीच्या ढिगाऱ्याखालून जखमींना बाहेर काढण्यासाठी शर्थीचे प्रयत्न करण्यात आले. सुरेशचंद्र मिश्रा आणि शालू यांना ढिगाऱ्याखालून बाहेर काढले गेले, मात्र तोपर्यंत त्यांची प्राणज्योत मालवली होती. सुरेशचंद्र यांची पत्नी आरती आणि मुलगा ऋतुराज हे गंभीर जखमी असून त्यांच्यावर सध्या राजावाडी रुग्णालयात उपचार सुरू आहेत. या घटनेमुळे संपूर्ण परिसरात शोककळा पसरली आहे, तसेच डोंगराच्या पायथ्याशी राहणाऱ्या लोकांच्या मनात पुन्हा एकदा भीतीचे वातावरण निर्माण झाले आहे. सध्या प्रशासनाने आजूबाजूची घरे रिकामी केली असून पुढील तपास सुरू आहे.
