Messi In Kolkata : कोलकात्यात मेस्सीचा भव्य सोहळा 'फ्लॉप'! - फक्त 10 मिनिटांत निघून गेल्याने चाहत्यांचा संताप, सॉल्ट लेक स्टेडियमवर गोंधळ

Messi In Kolkata : "12,000 रुपयांचे तिकीट घेऊन चेहराही दिसला नाही"; चाहत्यांकडून खुर्च्या, बाटल्यांची फेक; आयोजकांच्या नियोजनावर मोठे प्रश्नचिन्ह

ANI :- फुटबॉल विश्वातील महान खेळाडू लिओनेल मेस्सी याच्या भारत दौऱ्यासाठी कोलकात्यात चाहत्यांमध्ये मोठी उत्सुकता होती. मात्र, सॉल्ट लेक स्टेडियममध्ये आयोजित केलेला सन्मान सोहळा अपेक्षेपेक्षा अत्यंत कमी वेळेचा ठरला. अवघ्या काही मिनिटांतच मेस्सी स्टेडियममधून निघून गेल्याने उपस्थित हजारो चाहत्यांमध्ये प्रचंड नाराजी पसरली आणि स्टेडियमवर गोंधळाचे वातावरण निर्माण झाले.

स्टेडियममध्ये गोंधळ

मेस्सी निघून गेल्यानंतर संतप्त चाहत्यांनी मैदानात घुसण्याचा प्रयत्न केला. काहींनी खुर्च्या आणि पाण्याच्या बाटल्या फेकत आयोजकांप्रती आपला निषेध व्यक्त केला. या संपूर्ण घटनेचा व्हिडिओ सध्या सोशल मीडियावर व्हायरल होत आहे.

चाहत्यांच्या तीव्र प्रतिक्रिया

मेस्सीला नीट पाहता न आल्याने चाहत्यांनी तीव्र संताप व्यक्त केला.
एका चाहत्याने सांगितले, "मेस्सी फक्त 10 मिनिटांसाठी आला. त्याच्याभोवती फक्त राजकारणी आणि मंत्री होते. आम्हाला काहीच दिसले नाही. त्याने एकही किक घेतली नाही. आमचे इतके पैसे आणि वेळ वाया गेले."

दुसऱ्या एका संतप्त चाहत्याने म्हटले, "मेस्सीभोवती फक्त राजकारणी आणि अभिनेते होते. मग आम्हाला का बोलावले? आम्ही 12,000 रुपयांचे तिकीट घेतले, पण त्याचा चेहराही नीट दिसला नाही."

मेस्सीसारख्या दिग्गज खेळाडूच्या कार्यक्रमासाठी आयोजकांनी केलेले नियोजन सपशेल अपयशी ठरल्याचे या घटनेतून दिसून येत आहे. मेस्सीचा भारत दौरा ऐतिहासिक ठरण्याची अपेक्षा असताना, कोलकात्यातील हा प्रकार आयोजकांसाठी आणि प्रशासनासाठी मोठा चिंतेचा विषय ठरला आहे.