Malad Facebook Racket : सावधान! 'फेसबुक फ्रेंड'ने अश्लील व्हिडिओ बनवून विवाहित महिलेला लुटले; 33 लाखांच्या खंडणीनंतर मालवणी पोलिसांकडून मुसक्या आवळल्या

Malad Latest Crime News : भविष्य सांगण्याच्या बहाण्याने मैत्री, मार्वे बीचवर व्हिडिओ शुटींग आणि आत्महत्येची धमकी; आरोपी अमर महागावकर जेरबंद

मुंबई :- मुंबईतील मालवणी परिसरातून काळजाचा थरकाप उडवणारी एक घटना समोर आली आहे. एका विवाहित महिलेला फेसबुकवर मैत्रीच्या जाळ्यात ओढून, तिचा अश्लील व्हिडिओ बनवून तब्बल 33 लाख रुपयांना गंडा घालणाऱ्या एका भामट्याला मालवणी पोलिसांनी अटक केली आहे. अमर महागावकर असे या आरोपीचे नाव असून, तो मीरा रोड येथील रहिवासी आहे. विशेष म्हणजे, हा आरोपी कोणताही ज्योतिषी नसून व्यवसायाने ड्रायव्हर असल्याचे पोलीस तपासात निष्पन्न झाले आहे. Malad Latest Crime News

अशी केली फसवणूक

आरोपी अमर महागावकर याने अत्यंत नियोजनबद्ध पद्धतीने या महिलेला आपल्या जाळ्यात ओढले:

फेसबुकवर मैत्री: आरोपीने फेसबुकवर पीडित महिलेला फ्रेंड रिक्वेस्ट पाठवली आणि हळूहळू ऑनलाइन चॅटिंग सुरू केले.

भविष्य सांगण्याचे नाटक: "तुझे तुझ्या पतीशी आणि सासूशी पटत नाही," असे भाकीत करून त्याने महिलेचा विश्वास संपादन केला. आपण भविष्य जाणतो, असा बनाव करून त्याने तिला भेटायला बोलावले.

मार्वे बीचवर सापळा: विश्वास जिंकल्यानंतर त्याने महिलेला मालाडमधील मार्वे बीचवर फिरायला नेले. तिथे तिच्याशी जवळीक साधून गुपचूप अश्लील व्हिडिओ बनवला.

33 लाखांची लूट आणि आत्महत्येचा विचार

व्हिडिओ बनवल्यानंतर आरोपीने तो व्हायरल करण्याची धमकी देऊन महिलेला ब्लॅकमेल करण्यास सुरुवात केली. बदनामीच्या भीतीने पीडित महिलेने वेळोवेळी आरोपीला पैसे दिले. अशा प्रकारे आरोपीने तिच्याकडून तब्बल 33 लाख रुपये उकळले. मात्र, पैशांची मागणी थांबत नसल्याने वैतागलेल्या महिलेने 18 मार्च रोजी आपल्या पतीला 'आत्महत्या करत असल्याचा' निरोप पाठवला.

पतीच्या तत्परतेमुळे आरोपी गजाआड

पत्नीचा निरोप मिळताच पतीने तातडीने घर गाठले आणि तिला शांत करून सर्व हकीकत जाणून घेतली. त्यानंतर या दांपत्याने मालवणी पोलीस ठाण्यात धाव घेऊन तक्रार (FIR) दाखल केली. मालवणी पोलीस ठाण्याचे सहाय्यक पोलीस निरीक्षक दीपक जमदाडे आणि त्यांच्या पथकाने तांत्रिक तपासाच्या आधारे सापळा रचून अमर महागावकर याला मीरा रोड येथून अटक केली.