पनवेल तक्का येथे अतिक्रमणाचा दणका: किंग्स इलेक्ट्रॉनिक समोर पालिकेच्या जागेवर अण्णा भगत यांचा भंगारवाला आणि पान टपरीचा धंदा!

पनवेल : पनवेल तक्का येथील किंग्स इलेक्ट्रॉनिकच्या समोर पनवेल महानगरपालिकेच्या मालकीच्या जागेवर अण्णा भगत याने बेकायदा अतिक्रमण करून भंगारवाला आणि पान टपरीच्या नावाखाली भाडे वसूल करण्याचा धक्कादायक प्रकार समोर आला आहे. या बेकायदा धंद्याने परिसरात अस्वच्छता आणि गोंधळ वाढला असून, स्थानिक नागरिक त्रस्त झाले आहेत.

युवा ग्रामीण पत्रकार संघ, पनवेल तालुका अध्यक्षांनी याबाबत तीव्र निषेध व्यक्त करत पालिका प्रशासनाकडे त्वरित कारवाईची मागणी केली आहे. "पालिकेच्या जागेवर बेकायदा भाडे वसूल करणाऱ्या अण्णा भगत याच्यावर कठोर कारवाई झालीच पाहिजे," असे त्यांनी ठणकावून सांगितले. पालिकेच्या नाकावर टिच्चून सुरू असलेल्या या अतिक्रमणाच्या नाट्यामुळे प्रशासनाच्या कार्यक्षमतेवर प्रश्नचिन्ह निर्माण झाले आहे.

या प्रकारामुळे परिसरातील वाहतूक कोंडी आणि अस्वच्छतेचा प्रश्न गंभीर बनला आहे. तरीही पालिका अधिकाऱ्यांचे मौन आणि निष्क्रियता नागरिकांना चक्रावून टाकणारी आहे. आता प्रशासन कधी जागे होणार आणि अण्णा भगत याच्यावर कारवाई करणार, याकडे संपूर्ण पनवेलचे लक्ष लागले आहे.