Devendra Fadnavis : "इंधनाचा तुटवडा नाही, अफवा पसरवणाऱ्यांवर होणार 'सर्जिकल स्ट्राईक'!"; मुख्यमंत्री देवेंद्र फडणवीसांचा कडक इशारा

LPG ऐवजी आता घराघरांत पोहोचणार PNG; छगन भुजबळांचे गॅस पुरवठ्याबाबत मोठे विधान

मुंबई :- आखाती देशांमधील युद्धजन्य परिस्थितीमुळे भारतात इंधन आणि गॅसचा तुटवडा निर्माण झाल्याच्या चर्चांनी सर्वत्र खळबळ उडाली आहे. या पार्श्वभूमीवर मुख्यमंत्री देवेंद्र फडणवीस यांनी आज जनतेला आश्वस्त करत अत्यंत महत्त्वाची माहिती दिली आहे. "देशात आणि राज्यात पेट्रोल, डिझेल तसेच एलपीजी (LPG) गॅसचा मुबलक साठा उपलब्ध असून, तुटवड्याच्या अफवा पसरवणे हे 'देशविरोधी' काम आहे," अशा शब्दांत त्यांनी विरोधकांना आणि अफवाखोरांना सुनावले आहे.

लॉकडाऊनच्या अफवांवर मुख्यमंत्र्यांचा प्रहार

काही समाजकंटकांकडून इंधन टंचाईचे कारण पुढे करून पुन्हा 'लॉकडाऊन' लागणार असल्याच्या अफवा पसरवल्या जात आहेत. यावर मुख्यमंत्री कडक भाषेत म्हणाले, "पंतप्रधानांच्या मुत्सद्दी धोरणांमुळे भारताला इंधनाचा तुटवडा भासणार नाही, याची पूर्ण काळजी घेतली जात आहे. जे लोक विनाकारण गोंधळाची स्थिती निर्माण करत आहेत, त्यांच्यावर गुन्हे दाखल करून कडक कारवाई करण्याचे आदेश देण्यात आले आहेत."

LPG वरील भार कमी करण्यासाठी PNG वर भर

भविष्यातील गॅस टंचाई टाळण्यासाठी सरकारने आता शहरांमध्ये पीएनजी (PNG - पाईप्ड नॅचरल गॅस) कनेक्शनचे जाळे विस्तारण्यावर भर दिला आहे.

शहरांमधील गॅस सिलिंडरचा (LPG) लोड कमी करून पाईपलाईनद्वारे गॅस पोहोचवण्याचे काम युद्धपातळीवर सुरू आहे.

यासाठी सरकारने विशेष आदेश निर्गमित केले असून, यामुळे भविष्यात सिलिंडरच्या रांगा लावायची वेळ येणार नाही, असा विश्वास मुख्यमंत्र्यांनी व्यक्त केला.

छगन भुजबळांचे मोठे विधान: 3 महिन्यांत चित्र बदलणार?

राज्याचे मंत्री छगन भुजबळ यांनी मात्र या संदर्भात एक धक्कादायक माहिती दिली आहे. केंद्राच्या एका पत्राचा हवाला देत त्यांनी सांगितले की, "येत्या तीन महिन्यांत एलपीजी ऐवजी पीएनजीवर पूर्णपणे भर दिला जाण्याची शक्यता आहे. भविष्यातील जागतिक संकट लक्षात घेता, शहरांमध्ये एलपीजी गॅस पुरवठा मर्यादित करून नागरिकांना पीएनजी जोडणी घेण्यास प्रवृत्त केले जाईल." यामुळे येत्या काळात एलपीजी सिलिंडरची उपलब्धता कमी होऊ शकते, असे संकेत त्यांनी दिले आहेत.

आंतरराष्ट्रीय दरांचा ग्राहकांवर परिणाम नाही

जागतिक बाजारपेठेत कच्च्या तेलाच्या किमती वाढल्या असल्या तरी, केंद्र आणि राज्य सरकारने त्याचा थेट फटका सामान्य ग्राहकांना बसू दिलेला नाही. शेजारील देशांमध्ये आर्थिक आणि इंधन संकट सुरू असताना भारताची स्थिती स्थिर असल्याचे मुख्यमंत्र्यांनी ठामपणे सांगितले.

हेही वाचा: Sunetra Pawar : "दादा, तुमची उणीव शब्दांत मांडणे अशक्य" ; उपमुख्यमंत्री सुनेत्रा पवार