Buldhana News : बुलढाण्यात पतीकडून पत्नीची गळा आवळून हत्या; चारित्र्याच्या संशयातून घटना घडल्याची माहिती

Buldhana News :बुलढाणा : बुलढाणा जिल्ह्यातील किनगाव राजा येथे पतीने पत्नीची गळा आवळून हत्या केल्याची धक्कादायक घटना समोर आली आहे. संजीवनी दाभाडे असे मृत विवाहित महिलेचे नाव असून, संजय दाभाडे असे अटक करण्यात आलेल्या आरोपी पतीचे नाव आहे. चारित्र्याच्या संशयावरून पती-पत्नीमध्ये वारंवार वाद होत असल्याची माहिती समोर आली आहे. या घटनेमुळे परिसरात खळबळ उडाली आहे.https://maharashtramirror.com/ Buldhana News

मिळालेल्या माहितीनुसार, संजय दाभाडे हा पत्नी संजीवनी यांच्या चारित्र्यावर संशय घेत होता. याच कारणावरून गेल्या काही दिवसांपासून दोघांमध्ये वारंवार वाद होत होते. घटनेच्या दिवशीही पती-पत्नीमध्ये याच मुद्द्यावरून जोरदार वाद झाल्याची माहिती आहे. या वादाचे रूपांतर हिंसक घटनेत झाले आणि संतापलेल्या संजयने पत्नी संजीवनी यांचा गळा आवळून हत्या केल्याचा आरोप आहे.

घटनेची माहिती मिळताच किनगाव राजा पोलीस ठाण्याच्या पथकाने घटनास्थळी धाव घेतली. पोलिसांनी घटनास्थळाचा पंचनामा करून मृतदेह ताब्यात घेतला. याप्रकरणी पोलिसांनी आरोपी पती संजय दाभाडे याला अटक केली असून, त्याच्याविरुद्ध हत्येचा गुन्हा दाखल करण्यात आला आहे.

या हत्येमागील नेमकी कारणे, तसेच घटनेच्या वेळी काय घडले, याचा सखोल तपास किनगाव राजा पोलीस करत आहेत. चारित्र्याच्या संशयातून घडलेल्या या कथित हत्येच्या घटनेमुळे परिसरात हळहळ व्यक्त केली जात आहे.