Ajit Pawar : अजित पवारांच्या ताफ्यातील वाहनाला धक्का; गंभीर अपघात टळला

•अकोल्यात भरधाव रुग्णवाहिकेची ताफ्यातील गाडीला जोरदार धडक,पोलिसांची तत्काळ कारवाई, चालक ताब्यात; पवारांचा दौरा यथावत

अकोला | राज्याचे उपमुख्यमंत्री अजित पवार यांचा अकोला दौरा थोडक्यात थांबला असता! विमानतळावरून जिल्हाधिकारी कार्यालयाकडे निघालेल्या त्यांच्या ताफ्यातील एका वाहनाला भरधाव वेगातील रुग्णवाहिकेने जोरदार धडक दिली. या अचानक घडलेल्या घटनेमुळे ताफ्यात क्षणभर अफरातफरीचं वातावरण निर्माण झालं.

अपघात इतका जोरदार होता की दोन्ही वाहनांचे मोठ्या प्रमाणात नुकसान झाले. मात्र, मोठं सुदैव म्हणजे कोणतीही जीवितहानी झाली नाही. घटनास्थळी असलेल्या पोलिसांनी तत्काळ रुग्णवाहिकेच्या चालकाला ताब्यात घेतलं आणि चौकशीसाठी पोलिस मुख्यालयात नेण्यात आलं.

या अपघाताचा आणखी एक भावनिक पैलू म्हणजे, जिथे ही धडक झाली त्या परिसरातच काही वर्षांपूर्वी माजी आमदार तुकाराम बिडकर यांचा गंभीर अपघात झाला होता. त्यामुळे आजच्या घटनेनं त्या भयावह आठवणी पुन्हा जाग्या केल्या.

दरम्यान, अजित पवार यांनी या प्रकारानंतरही दौरा रद्द न करता, नियोजित अकोला व वाशीम जिल्ह्यांचा आढावा घेतला आणि खामगाव येथील पक्ष प्रवेश सोहळ्यासाठी प्रस्थान केलं. या वेळी आमदार रणधीर सावरकर, अमोल मिटकरी, संजय खोडके, अप्पर जिल्हाधिकारी प्रमोद गायकवाड आणि पोलीस अधीक्षक अर्जित चांडक आदी मान्यवर उपस्थित होते.

हेही वाचा: Former CM Vijay Rupani : अहमदाबादमध्ये एअर इंडिया विमान कोसळले; विजय रुपाणीही होते विमानात!