26/11 Mumbai Attack: 26/11 चे शहीद अरुण चित्ते यांना मरणोत्तर एएसआय पदोन्नती

26/11 Mumbai Attack:शौर्याला उंच मान मिळाला; कुटुंबाला मुंबई पोलिसांकडून सन्मान

मुंबई : 26/11 च्या मुंबईवरील दहशतवादी हल्ल्यात शहीद झालेले पोलीस चालक अरुण चित्ते यांना अखेर त्यांच्या शौर्याची अधिकृत दखल मिळाली असून, त्यांना मरणोत्तर सहायक पोलीस उपनिरीक्षक (ASI) पदावर पदोन्नत करण्यात आले आहे. हा आदेश 1 जून 2025 पासून लागू झाला आहे. 26/11 Mumbai Attack

शहीद चित्ते यांच्या बलिदानाला कायमस्वरूपी अभिवादन

अरुण चित्ते हे वरिष्ठ पोलीस निरीक्षक विजय सालस्कर यांचे विश्वासू चालक होते. 26 नोव्हेंबर 2008 रोजी कसाब आणि अबू इस्माईल या अतिरेक्यांच्या गोळीबारात ते शहीद झाले. त्यांचा निःस्वार्थ बलिदान आणि कर्तव्यनिष्ठा आजही मुंबई पोलिस दलात सन्मानाने स्मरणात आहे.

या पदोन्नतीचा आदेश त्यांच्या कुटुंबाला 3 जून रोजी मुंबई पोलीस आयुक्तालयात झालेल्या विशेष समारंभात प्रदान करण्यात आला. कार्यक्रमात त्यांचा सन्मानपूर्वक गौरव करण्यात आला आणि त्यांच्या देशसेवेचे भावनिक स्मरण करण्यात आले.

मुंबई पोलिसांनी आपल्या अधिकृत सोशल मीडिया हँडलवरून लिहिले की, "हा आमच्यासाठी अभिमानास्पद आणि भावनिक दिवस होता. ही केवळ एक पदोन्नती नाही, तर त्यांच्या बलिदानास दिलेली आमची विनम्र श्रद्धांजली आहे."

अरुण चित्ते यांच्या पश्चात पत्नी आणि तीन मुली आहेत. ही पदोन्नती त्यांच्या कुटुंबासाठी केवळ सन्मान नसून, शौर्य आणि सेवाभावाची प्रेरणादायी ओळख ठरली आहे. चित्ते यांचे नाव आता केवळ 26/11 च्या शहिदांमध्येच नव्हे, तर अत्युच्च सन्मानाच्या यादीतही नोंदवले गेले आहे.