Skip to content

महापालिकेच्या पत्रकार कक्षात ‘रील’बाजीचा वाद; युवासेनेचा थेट आंदोलनाचा इशारा

नगरसेवकांच्या छायाचित्रकारांकडून अनधिकृत चित्रीकरणाचा हेमंत बागुल यांचा आरोप; कारवाई न झाल्यास ५० कार्यकर्त्यांसह कक्षात शिरण्याचा इशारा

Vikrant Kulkarni
Vikrant Kulkarni

2 min read

महापालिकेच्या पत्रकार कक्षात ‘रील’बाजीचा वाद; युवासेनेचा थेट आंदोलनाचा इशारा
नगरसेवकांच्या छायाचित्रकारांकडून अनधिकृत चित्रीकरणाचा हेमंत बागुल यांचा आरोप; कारवाई न झाल्यास ५० कार्यकर्त्यांसह कक्षात शिरण्याचा इशारा

पुणे: पुणे महानगरपालिकेच्या पत्रकार कक्षाचा (प्रेस रूम) वापर काही नगरसेवकांचे खासगी छायाचित्रकार आणि 'रील' तयार करणाऱ्या व्यक्तींकडून अनधिकृत चित्रीकरणासाठी केला जात असल्याचा गंभीर आरोप युवासेनेचे पुणे महानगर अध्यक्ष हेमंत आबा बागुल यांनी केला आहे. या प्रकारामुळे पत्रकार कक्षाच्या शिस्तीला बाधा येत असून, प्रशासनाने यावर तातडीने कारवाई न केल्यास आगामी सर्वसाधारण सभेवेळी ५० कार्यकर्त्यांसह पत्रकार कक्षात प्रवेश करू, असा आक्रमक इशारा बागुल यांनी दिला आहे.

नेमका आरोप काय?

महानगरपालिकेच्या मुख्य इमारतीतील पत्रकार कक्ष हा केवळ अधिकृत पत्रकार आणि माध्यम प्रतिनिधींच्या कामकाजासाठी राखीव आहे. मात्र, गेल्या काही काळापासून काही लोकप्रतिनिधींचे सोशल मीडिया हँडलर्स, खासगी फोटोग्राफर्स आणि रील निर्माते या कक्षात बसून चित्रीकरण करत असल्याचे समोर आले आहे. यासंदर्भात खुद्द महापौरांनी दिलेले निर्देशही धाब्यावर बसवले जात असल्याचा दावा हेमंत बागुल यांनी केला आहे.

प्रशासनाला निर्वाणीचा इशारा

पत्रकार कक्षातील या अनधिकृत वावरावर आक्षेप घेत बागुल यांनी महापालिका प्रशासनाच्या कार्यपद्धतीवर प्रश्नचिन्ह उपस्थित केले आहे. "जर नियमांचे उल्लंघन करून खासगी व्यक्तींना पत्रकार कक्षात मुभा दिली जात असेल, तर प्रशासनाने तातडीने यावर निर्बंध आणावेत. अन्यथा, सर्वसाधारण सभेच्या दिवशी आम्ही ५० जणांसह पत्रकार कक्षात प्रवेश करून याचा जाब विचारू," असा इशारा त्यांनी दिला आहे.

दरम्यान, युवासेनेकडून करण्यात आलेल्या या आरोपांबाबत अद्याप स्वतंत्रपणे कोणतीही अधिकृत पुष्टी होऊ शकलेली नाही. तसेच, या संपूर्ण प्रकरणावर महापालिका प्रशासनाची अधिकृत भूमिका अद्याप स्पष्ट झालेली नसून प्रशासन काय पावले उचलते, याकडे लक्ष लागले आहे.

Share
Vikrant Kulkarni

News and Vedio editor

i am vikrant kulkarni. i am news and vedio editor of maharashtra mirror news paper