केरळ भाजपला सलग दुसऱ्या दिवशी धक्का; पद्मिनी थॉमस यांची पक्षाला सोडचिठ्ठी, काँग्रेसमध्ये घरवापसी करणार
भाजपने दिलेली आश्वासने पूर्ण केली नसल्याचा आरोप; आमदारकीचे तिकीट आणि क्रीडा क्षेत्रातील महत्त्वाच्या पदाची अपेक्षा अपूर्ण राहिल्याने निर्णय
2 min read

केरळ : केरळच्या राजकारणात भारतीय जनता पक्षाला सलग दुसऱ्या दिवशी धक्का बसला आहे. भाजपच्या राष्ट्रीय कार्यकारिणीच्या सदस्या पद्मजा वेणुगोपाल यांनी पक्षाचा राजीनामा दिल्यानंतर आता केरळ भाजप अल्पसंख्याक मोर्चाच्या उपाध्यक्षा पद्मिनी थॉमस यांनीही पक्ष सोडण्याचा निर्णय जाहीर केला आहे. भाजपमध्ये प्रवेश करताना दिलेली आश्वासने पूर्ण झाली नसल्याचा आरोप करत त्यांनी पुन्हा काँग्रेसमध्ये प्रवेश करण्याची इच्छा व्यक्त केली आहे. त्यामुळे केरळमधील राजकीय वर्तुळात चर्चेला सुरुवात झाली आहे.
भाजपकडून दिलेली आश्वासने पूर्ण झाली नसल्याचा आरोप
पद्मिनी थॉमस यांनी भाजप प्रदेशाध्यक्ष राजीव चंद्रशेखर यांच्याकडे राजीनामा सादर करणार असल्याचे सांगितले आहे. भाजपमध्ये प्रवेश करताना राजकीय आणि क्रीडा क्षेत्रात काम करण्याची मोठी संधी मिळेल, अशी अपेक्षा त्यांनी व्यक्त केली होती. तसेच आमदारकीचे तिकीट आणि क्रीडा क्षेत्रातील महत्त्वाचे पद देण्याचे आश्वासन मिळाल्याचा दावाही त्यांनी केला. मात्र, प्रत्यक्षात यापैकी कोणत्याही आश्वासनाची पूर्तता झाली नसल्याने आपण पक्ष सोडण्याचा निर्णय घेतल्याचे त्यांनी स्पष्ट केले.
दोन वर्षांपूर्वी काँग्रेस सोडून भाजपमध्ये प्रवेश
पद्मिनी थॉमस या अर्जुन पुरस्कारप्राप्त माजी खेळाडू आहेत. सुमारे दोन वर्षांपूर्वी त्यांनी काँग्रेसला सोडचिठ्ठी देत भाजपमध्ये प्रवेश केला होता. भाजपमध्ये आल्यानंतर राजकारणासह क्रीडा क्षेत्रातही सक्रिय भूमिका बजावण्याची त्यांची इच्छा होती. नुकत्याच झालेल्या स्थानिक स्वराज्य संस्थांच्या निवडणुकीत त्यांनी भाजपच्या तिकिटावर निवडणूक लढवली होती. मात्र, या निवडणुकीत त्यांना पराभवाचा सामना करावा लागला.
'काँग्रेसच्या कुटुंबात पुन्हा परतणार'
काँग्रेसमध्ये घरवापसी करण्याच्या निर्णयाबाबत बोलताना पद्मिनी थॉमस यांनी आपण काँग्रेसच्या कुटुंबातील असल्याचे म्हटले आहे. पुन्हा काँग्रेसमध्ये प्रवेश करून पक्षासाठी काम करण्याची आपली इच्छा असल्याचे त्यांनी सांगितले. विशेष म्हणजे, काँग्रेसमध्ये परतण्यासाठी आपण कोणतीही अट ठेवलेली नाही, असेही त्यांनी स्पष्ट केले. तसेच पद्मजा वेणुगोपाल यांच्या राजीनाम्याशी आपल्या निर्णयाचा काहीही संबंध नसल्याचे त्यांनी सांगितले. आपण गेल्या वर्षभरापासून भाजपच्या कामकाजापासून दूर असल्याचाही त्यांनी उल्लेख केला.
पद्मजा वेणुगोपाल यांच्या राजीनाम्यानंतर दुसरा निर्णय
दरम्यान, केरळचे माजी मुख्यमंत्री के. करुणाकरन यांच्या कन्या पद्मजा वेणुगोपाल यांनीही भाजपचा राजीनामा दिला आहे. भाजपमध्ये प्रवेश करणे ही आपली वैयक्तिक चूक होती, अशी प्रतिक्रिया त्यांनी दिली होती. त्यांच्या राजीनाम्यानंतर दुसऱ्याच दिवशी पद्मिनी थॉमस यांनीही पक्ष सोडण्याची घोषणा केल्याने केरळ भाजपमधील राजकीय घडामोडी चर्चेत आल्या आहेत. आता पद्मिनी थॉमस यांची काँग्रेसमध्ये अधिकृत घरवापसी कधी होणार आणि त्यांच्या निर्णयाचा केरळमधील भाजपच्या संघटनात्मक घडामोडींवर काय परिणाम होणार, याकडे राजकीय वर्तुळाचे लक्ष लागले आहे.

i am vikrant kulkarni. i am news and vedio editor of maharashtra mirror news paper




