Delhi Bomb Blast News : लाल किल्ला स्फोटानंतर संपूर्ण राजधानी हादरली! मुंबईसह देशात ‘हाय अलर्ट’ जारी

•दिल्लीतील स्फोटात 9 जणांचा मृत्यू; मृतांचा आकडा वाढण्याची भीती; सुरक्षा यंत्रणा सतर्क

मुंबई :- राजधानी दिल्लीतील लाल किल्ला मेट्रो स्टेशनजवळ आज संध्याकाळी झालेल्या भीषण स्फोटानंतर मोठी खळबळ उडाली आहे. या स्फोटात आतापर्यंत अकरा जणांचा मृत्यू झाल्याची माहिती समोर आली असून, मृतांचा आकडा वाढण्याची भीती व्यक्त होत आहे. दिल्लीतील या गंभीर घटनेनंतर संपूर्ण राजधानीमध्ये हाय अलर्ट जारी करण्यात आला आहे. एवढेच नाही तर, आर्थिक राजधानी मुंबईसह देशातील प्रमुख शहरांमध्येही तातडीने हाय अलर्ट जारी करण्यात आला आहे.

स्फोटाचा तपशील

लाल किल्ला मेट्रो स्टेशनच्या गेट नंबर एक जवळ पार्किंगमध्ये उभ्या असलेल्या एका कारमध्ये हा स्फोट झाला. सुरुवातीला हा सिलेंडरचा स्फोट असल्याचं वाटत होतं, मात्र स्फोट गंभीर असल्याचं नंतर समोर आलं आणि त्यामुळे मोठं नुकसान झालं आहे. स्फोटाचं ठिकाण लाल किल्ल्यापासून अवघ्या 800 मीटर अंतरावर असल्याने सुरक्षा यंत्रणांनी संपूर्ण परिसर रिकामा केला आहे.

मुंबईत हाय अलर्ट आणि उपाययोजना: दिल्लीतील स्फोटानंतर मुंबईत तातडीने सुरक्षा वाढवण्यात आली आहे:

सर्व पोलीस ठाण्यांना सूचना देण्यात आल्या असून, शहरात नाकाबंदी करण्यात आली आहे.

संशयित व्यक्तींची यादृच्छिक झडती घेतली जाईल.

ग्राऊंड इंटेलिजन्स नेटवर्क सक्रिय करण्यात आले आहे.

संवेदनशील भागात गस्त वाढविण्याचे आदेशही देण्यात आले आहेत.

तपास यंत्रणा घटनास्थळी: स्फोटाच्या घटनेनंतर अग्नीशमन दलाने आग आटोक्यात आणण्यासाठी प्रयत्न केले. तसेच, एन.एस.जी.चे (NSG) वरिष्ठ अधिकारी आणि फॉरेन्सिक टीम या ठिकाणी दाखल झाली असून, स्फोटामागची कारणे शोधण्यासाठी आणि पुरावे गोळा करण्याचे काम युद्धपातळीवर सुरू आहे.

दिल्लीमध्ये झालेल्या या स्फोटानंतर राजधानीतील भीतीचे वातावरण मुंबईसह इतर प्रमुख शहरांमध्ये पसरले आहे आणि संपूर्ण सुरक्षा यंत्रणा सतर्क झाली आहे.