Raigad Political News : रत्नागिरीत उदय सामंतांचा करिष्मा; राजापुरात काँग्रेसने मारली बाजी, तर श्रीवर्धनमध्ये आदिती तटकरेंना धक्का
रत्नागिरी/रायगड | कोकणातील 17 नगरपालिका आणि 4 नगरपंचायतींच्या निवडणुकीत महायुतीमधील घटक पक्षांमध्येच खरी चुरस पाहायला मिळाली. संपूर्ण कोकणात शिवसेनेच्या (शिंदे गट) 8 जागांसह 5 जागांवर भाजपने आणि 3 जागांवर राष्ट्रवादीने (अजित पवार) विजय मिळवला आहे. मात्र, रायगड आणि सिंधुदुर्ग जिल्ह्यात महायुतीमधील विसंवादामुळे भाजप आणि राष्ट्रवादीच्या बालेकिल्ल्यांना सुरुंग लागला आहे.
रायगड: महायुतीतील ‘कुरघोड्या’ ठरल्या निर्णायक
रायगड जिल्ह्यातील 10 नगरपालिकांपैकी बहुतांश ठिकाणी महायुतीचेच घटक पक्ष आमनेसामने उभे होते.
श्रीवर्धनमध्ये मंत्री आदिती तटकरे यांच्या बालेकिल्ल्यात राष्ट्रवादीचे जितेंद्र सातनाक यांना पराभवाचा धक्का बसला असून, तिथे ठाकरे गटाचे अतुल चौगुले विजयी झाले आहेत. महाडमध्येही राष्ट्रवादीला धक्का देत शिवसेनेच्या सुनील कविस्कर यांनी बाजी मारली.
इतर पक्ष: उरण आणि खोपोलीत भाजपला, तर मुरुडमध्ये शिंदे गटाला पराभव स्वीकारावा लागला. शेकाप, राष्ट्रवादी (शरद पवार गट) आणि ठाकरे गटाने प्रत्येकी 1-1 जागा जिंकून आपले अस्तित्व दाखवून दिले आहे.
सिंधुदुर्ग: निलेश राणेंचा आक्रमक पवित्रा आणि भाजपला दणका
सिंधुदुर्गात शिवसेना शिंदे गट आणि भाजपमध्ये टोकाचा संघर्ष पाहायला मिळाला. शिवसेना आमदार निलेश राणे यांनी घेतलेल्या आक्रमक भूमिकेमुळे भाजपला कणकवली नगरपंचायत आणि मालवण नगरपालिकेत पराभव स्वीकारावा लागला. मात्र, भाजपने सावंतवाडी आणि कुडाळ या दोन नगरपालिका टिकवण्यात यश मिळवले आहे.
रत्नागिरी: उदय सामंतांचे वर्चस्व, पण राजापुरात ‘मिसफायर’
रत्नागिरी जिल्ह्यात मात्र महायुतीमध्ये एकोपा पाहायला मिळाला, ज्याचे श्रेय मंत्री उदय सामंत यांना जाते.
महायुतीची सरशी: रत्नागिरी, खेड, चिपळूण आणि लांजा येथे शिवसेनेचे, तर गुहागर आणि देवरुखमध्ये भाजपचे नगराध्यक्ष निवडून आले.
आमदार किरण सामंत यांच्या मतदारसंघात असलेल्या राजापूर नगरपालिकेत महायुतीला पराभवाचा सामना करावा लागला. येथे काँग्रेसच्या माजी आमदार हुस्नबानू खलिफे निवडून आल्याने सर्वांच्या भुवया उंचावल्या आहेत. हा निकाल आमदार किरण सामंत यांच्यासाठी मोठा धक्का मानला जात आहे.
पक्षीय बलाबल (कोकण – 21 जागा):
- शिवसेना (शिंदे गट): 08
- भाजप: 05
- राष्ट्रवादी (अजित पवार गट): 03
- शिवसेना (ठाकरे गट): 01
- काँग्रेस: 01
- राष्ट्रवादी (शरद पवार गट): 01
- शेकाप: 01
- इतर: 01
