History Of Teacher Day : शिक्षक दिनाचा प्रेरणादायी इतिहास: डॉ. सर्वपल्ली राधाकृष्णन यांच्या स्मृतींना उजाळा
मुंबई :- देशाच्या प्रगतीमध्ये आणि भावी पिढीच्या जडणघडणीत शिक्षकांचे योगदान अनमोल असते. याच योगदानाला आदराने व कृतज्ञतेने सन्मानित करण्यासाठी भारतात दरवर्षी 5 सप्टेंबर रोजी शिक्षक दिन साजरा केला जातो. हा दिवस भारताचे दुसरे राष्ट्रपती आणि थोर शिक्षणतज्ञ डॉ. सर्वपल्ली राधाकृष्णन यांचा जन्मदिवस आहे. Teacher Day 2025
शिक्षक दिन का साजरा केला जातो?
डॉ. सर्वपल्ली राधाकृष्णन यांनी आपले जीवन शिक्षण क्षेत्रासाठी समर्पित केले. ते एक उत्कृष्ट शिक्षक, तत्त्वज्ञ आणि विद्वान होते. 1962 साली जेव्हा ते भारताचे दुसरे राष्ट्रपती झाले, तेव्हा त्यांच्या काही विद्यार्थ्यांनी त्यांचा वाढदिवस साजरा करण्याची इच्छा व्यक्त केली. यावर डॉ. राधाकृष्णन यांनी नम्रपणे उत्तर दिले की, “माझा वाढदिवस वेगळा साजरा करण्याऐवजी जर हा दिवस देशातील सर्व शिक्षकांच्या सन्मानार्थ ‘शिक्षक दिन’ म्हणून साजरा केला, तर मला अधिक आनंद होईल.” त्यांच्या या विचारांचा आदर करत तेव्हापासून 5 सप्टेंबर हा दिवस देशभरात शिक्षक दिन म्हणून साजरा होऊ लागला. Why Teachers Day Celebrate ?
डॉ. सर्वपल्ली राधाकृष्णन यांचे योगदान
शिक्षण क्षेत्रात डॉ. राधाकृष्णन यांचे योगदान अतुलनीय आहे. त्यांनी शिक्षणाचे महत्त्व अधोरेखित केले. त्यांच्या मते, शिक्षक केवळ ज्ञान देत नाहीत, तर ते विद्यार्थ्यांमध्ये चारित्र्य, नैतिकता आणि चांगले संस्कार रुजवून त्यांना एक आदर्श नागरिक बनवतात. त्यांनी बनारस हिंदू विद्यापीठाचे कुलगुरू म्हणूनही काम केले. भारताच्या शैक्षणिक धोरणांना आकार देण्यामध्ये त्यांचा मोठा वाटा होता. त्यांच्या योगदानाला सलाम म्हणून 1954 मध्ये त्यांना भारतरत्न या सर्वोच्च नागरी पुरस्काराने सन्मानित करण्यात आले.
