Kharghar News : श्री सत्य साई संजीवनी रुग्णालयात ६१९ बालरुग्णांना हृदय शस्त्रक्रियेद्वारे नवे आयुष्य
खारघर जितिन शेट्टी : नवी मुंबईतील खारघर येथील श्री सत्य साई संजीवनी सेंटर फॉर चाइल्ड हार्ट केअरने गेल्या पाच वर्षांत जन्मजात हृदयविकाराने ग्रस्त ६१९ बालरुग्णांवर यशस्वी मोफत शस्त्रक्रिया करून त्यांना नवे आयुष्य दिले आहे. रोटरी क्लब ऑफ बॉम्बे एअरपोर्टच्या ‘गिफ्ट ऑफ लाईफ’ प्रकल्पांतर्गत आणि प्रकल्पाचे अध्यक्ष पीपी नितीन मेहता यांच्या मार्गदर्शनाखाली या शस्त्रक्रियांसाठी १० कोटी रुपयांचा निधी उभारण्यात आला.या यशस्वी मोहिमेचा आनंद साजरा करण्यासाठी ज्येष्ठ क्रिकेटपटू सुनील गावस्कर यांनी रुग्णालयाला भेट देऊन बालरुग्ण आणि त्यांच्या कुटुंबीयांशी संवाद साधला. गावस्कर यांनी या उपक्रमाचे कौतुक करताना सांगितले, “या धाडसी मुलांना भेटणे हृदयस्पर्शी आहे.
रुग्णालय आणि रोटरी क्लबचे निःस्वार्थ कार्य प्रेरणादायी आहे.”जन्मजात हृदयविकारामुळे मुलांना हृदयातील छिद्रे, झडपांशी संबंधित समस्या किंवा असामान्य रक्तवाहिन्यांचा सामना करावा लागतो. यावर वेळीच उपचार न झाल्यास दम लागणे, वाढ खुंटणे, वारंवार संसर्ग किंवा अकाली मृत्यू यासारख्या गंभीर समस्या उद्भवू शकतात. भारतात दरवर्षी २ लाखांहून अधिक मुले जन्मजात हृदयविकारांसह जन्माला येतात, त्यापैकी ७०,००० मुलांना पहिल्या वर्षातच शस्त्रक्रियेची गरज असते. मात्र, आर्थिक अडचणी आणि जागरूकतेच्या अभावामुळे अनेकांना वेळीच उपचार मिळत नाहीत. रोटरी क्लब ऑफ बॉम्बे एअरपोर्टचे अध्यक्ष पीपी नितीन मेहता म्हणाले, “प्रत्येक मुलाला निरोगी हृदयासह जगण्याची संधी मिळायला हवी.
‘गिफ्ट ऑफ लाईफ’ उपक्रमाद्वारे आम्ही अशा मुलांपर्यंत पोहोचण्याचा प्रयत्न करतो. शस्त्रक्रियेनंतर मुलांचे हसणे पाहणे हा आमच्यासाठी मानवतेचा सर्वोत्तम अनुभव आहे.”श्री सत्य साई संजीवनी रुग्णालयाच्या बालरोग हृदयरोग शस्त्रक्रिया विभागाच्या प्रमुख डॉ. प्रभात रश्मी यांनी सांगितले, “जन्मजात हृदयविकाराने जन्मलेली बाळे कमकुवत दिसतात, त्यांना श्वास घेण्यास त्रास होतो किंवा त्वचा निळसर पडते. वेळीच निदान आणि शस्त्रक्रिया यामुळे त्यांचे आयुष्य वाचवता येते. इकोकार्डियोग्राम आणि स्क्रीनिंगसारख्या तपासण्या महत्त्वाच्या ठरतात.”वेळीच उपचार केल्यास मुलांना निरोगी आणि सक्रिय आयुष्य जगता येते. उशिरा उपचार झाल्यास हृदयविकार, विकासात अडथळे किंवा मृत्यूचा धोका वाढतो. यासाठी जागरूकता, नियमित तपासणी आणि दर्जेदार उपचारांची गरज आहे.सुनील गावस्कर यांनी या उपक्रमाचे कौतुक करताना सांगितले, “वेळीच उपचाराने अमूल्य जीव वाचवता येतात. या मुलांचे धाडस आणि रुग्णालयाचे कार्य खरोखरच प्रेरणादायी आहे.”या उपक्रमामुळे अनेक बालरुग्णांना नवे आयुष्य मिळाले असून, रोटरी क्लब आणि श्री सत्य साई संजीवनी रुग्णालयाचे कार्य समाजासाठी एक आदर्श ठरले आहे.
