•’मी मंडल आयोगासाठी शिवसेना सोडली, आता ओबीसींसाठी लढायचं नाही का?’- छगन भुजबळ
नागपूर :- मराठा आरक्षणाला ओबीसी कोट्यातून विरोध करत राज्याचे मंत्री छगन भुजबळ पुन्हा एकदा आक्रमक झाले आहेत. गेल्या काही दिवसांपासून ओबीसी आरक्षणाच्या मुद्द्यावर भुजबळ जोरदार भूमिका मांडत आहेत. लातूरमधील त्यांची लगबग आणि आज नागपूरमध्ये सुरू असलेल्या ओबीसी नेत्यांच्या बैठकीवरून या आंदोलनाची पुढील दिशा स्पष्ट होण्याची शक्यता आहे. या बैठकीपूर्वीच भुजबळ यांनी राष्ट्रवादी काँग्रेसचे अध्यक्ष शरद पवार यांना थेट लक्ष्य करत अनेक प्रश्न विचारले आहेत, ज्यामुळे राजकीय वर्तुळात मोठी खळबळ उडाली आहे.
पवारांना कोंडीत पकडण्याचा प्रयत्न
भुजबळ यांनी शरद पवार यांच्यावर निशाणा साधताना म्हटले की, “आम्ही शरद पवार साहेबांचा सन्मान करतो, परंतु मी मंडल आयोग लागू व्हावा यासाठी शिवसेना सोडून त्यांच्यासोबत आलो होतो. मग आता आम्ही ओबीसी आरक्षणासाठी लढायचं नाही का?” भुजबळ यांनी पवारांच्या एका विधानाचा उल्लेख करत त्यांना कोंडीत पकडण्याचा प्रयत्न केला. पवारांनी मराठा समितीमध्ये सर्व समाजाचे नेते असल्याचे म्हटले, तर ओबीसी समितीमध्ये फक्त ओबीसी नेते असल्याचा त्यांचा दावा आहे. यावर भुजबळ म्हणाले की, मराठा समिती ही उद्धव ठाकरे यांच्या सरकारच्या काळात स्थापन झाली होती आणि त्यावेळी राष्ट्रवादी, काँग्रेस व शिवसेनेचे मंत्री त्यात होते.
सर्वपक्षीय बैठकांना पवार गैरहजर का?
सामाजिक सलोखा निर्माण करण्यासाठी मुख्यमंत्री, उपमुख्यमंत्री आणि भुजबळ यांनी पुढाकार घ्यावा, असा सल्ला शरद पवार यांनी दिला होता. यावर पलटवार करताना भुजबळ म्हणाले, “जेव्हा सर्वपक्षीय बैठका बोलावल्या जातात, तेव्हा शरद पवार का गैरहजर राहतात?” भुजबळ यांनी माजी मुख्यमंत्री उद्धव ठाकरे यांच्या काळातील मराठा समितीची आठवण करून देत, त्यावेळी शरद पवारच या समितीचे मार्गदर्शक होते, असे म्हटले. त्यावेळी राष्ट्रवादीकडून अजित पवार आणि जयंत पाटील, शिवसेनेकडून एकनाथ शिंदे आणि सुभाष देसाई, तर काँग्रेसकडून बाळासाहेब थोरात आणि अशोक चव्हाण या समितीमध्ये होते. त्यावेळी पवारांनी यावर काहीच भूमिका का घेतली नाही, असा टोला भुजबळांनी लगावला.
भुजबळ यांच्या या भूमिकेमुळे ओबीसी आणि मराठा आरक्षणावरून राज्यातील राजकारण आणखी तापण्याची शक्यता आहे. नागपूरमधील बैठकीनंतर त्यांच्या आंदोलनाची पुढील दिशा काय असेल, हे लवकरच स्पष्ट होईल.
