Vasai Virar Latest Political News : भाजपा-शिंदे गटाला रोखण्यासाठी नवी रणनीती; ठाकरे गट मात्र ‘एकला चलो रे’च्या भूमिकेत?
वसई-विरार | आगामी महानगरपालिका निवडणुकीसाठी वसई-विरारमध्ये अत्यंत अनपेक्षित राजकीय समीकरण पाहायला मिळत आहे. गेल्या अनेक वर्षांपासून वसई-विरारवर एकहाती वर्चस्व राखणाऱ्या बहुजन विकास आघाडीने आता मनसेशी हातमिळवणी केली आहे. या युतीमुळे जिल्ह्याच्या राजकारणात मोठी उलथापालथ होण्याची शक्यता वर्तवण्यात येत आहे.
पक्षवाढीसाठी मनसेचा ‘बविआ’ला पाठिंबा
वसई-विरार महापालिकेत सध्या मनसेची एकही जागा नाही. त्यामुळे या भागात पक्षाचे अस्तित्व निर्माण करण्यासाठी आणि कार्यकर्त्यांना बळ देण्यासाठी राज ठाकरे यांनी हितेंद्र ठाकूर यांच्याशी जुळवून घेण्याचा निर्णय घेतला आहे. दुसरीकडे, हितेंद्र ठाकूर यांनाही भाजपा आणि शिवसेना (शिंदे गट) यांच्या वाढत्या प्रभावाला रोखण्यासाठी स्थानिक पातळीवर एका आक्रमक मित्रपक्षाची गरज होती, जी मनसेच्या रूपाने पूर्ण होताना दिसत आहे.
‘शिट्टी’ की ‘इंजिन’? चिन्हाची अट कळीची
युती निश्चित झाली असली तरी, बहुजन विकास आघाडीने मनसेसमोर एक मोठी अट ठेवली आहे. भाजपा-शिंदे गटाचा पराभव करण्यासाठी दोन्ही पक्षांच्या उमेदवारांनी बहुजन विकास आघाडीच्या ‘शिट्टी’ या चिन्हावरच निवडणूक लढवावी, असे ‘बविआ’चे म्हणणे आहे. मनसे आपले ‘इंजिन’ बाजूला ठेवून ठाकूर यांच्या चिन्हावर निवडणूक लढवणार का? यावर येत्या दोन दिवसांत निर्णय अपेक्षित आहे.
वसई-विरार महापालिका: राजकीय गणित (115 जागा)
नगरसेवकांची मुदत जून 2020 मध्ये संपल्यानंतर तब्बल साडेपाच वर्षांनी येथे निवडणुका होत आहेत. यावेळी प्रभागांची रचना आणि आरक्षणाची स्थिती खालीलप्रमाणे आहे.
प्रभाग संख्या: 29 (बहुसदस्यीय प्रभाग पद्धत).
एकूण सदस्य संख्या: 115.
महिला आरक्षण: 58 जागा (50 टक्क्यांहून अधिक).
पुरुष प्रतिनिधी: 57 जागा.
राखीव जागा: अनुसूचित जाती (SC) साठी 5 आणि अनुसूचित जमाती (ST) साठी 5 जागा राखीव आहेत.
