Vaibhav Suryavanshi : 14 वर्षीय वैभव सूर्यवंशीचा वर्ल्ड रेकॉर्ड! अंडर-19 विश्वचषकाच्या फायनलमध्ये इंग्लंडविरुद्ध झळकावलं वादळी शतक

•U-19 World Cup Champion Vaibhav Suryavanshi: 80 चेंडूत 175 धावांची ऐतिहासिक खेळी; एका डावात सर्वाधिक षटकार मारण्याचा जागतिक विक्रम मोडीत

हरारे स्पोर्ट्स क्लबवर खेळवल्या जाणाऱ्या अंडर-19 विश्वचषक 2026 या अंतिम सामन्यात भारतीय सलामीवीर वैभव सूर्यवंशी याने इंग्लंडच्या गोलंदाजांची अक्षरशः पिसं काढली. अवघ्या 80 चेंडूत 175 धावांची तुफानी खेळी करत त्याने भारताला विशाल धावसंख्येकडे नेले असून, एकाच डावात सर्वाधिक षटकार लगावणारा तो जगातील पहिला खेळाडू ठरला आहे.

दमदार भागीदारी आणि अर्धशतकांचा पाऊस

भारताने नाणेफेक जिंकून प्रथम फलंदाजीचा निर्णय घेतला. जरी सलामीवीर आरोन जॉर्ज चौथ्या षटकात स्वस्तात बाद झाला असला, तरी वैभव सूर्यवंशीने आयुष म्हात्रे (50 धावा) सोबत मिळून इंग्लंडच्या गोलंदाजांवर प्रतिहल्ला चढवला. या दोघांनी अवघ्या 90 चेंडूत 142 धावांची वेगवान भागीदारी रचली. वैभवने सुरुवातीला 32 चेंडूत आपले अर्धशतक पूर्ण केले आणि त्यानंतर अधिकच आक्रमक पवित्रा घेतला.

विक्रमांचा डोंगर: षटकारांचा बादशाह

वैभव सूर्यवंशीने या डावात अनेक मोठ्या विक्रमांना गवसणी घातली आहे:

वादळी खेळी: 80 चेंडूत 175 धावा (15 चौकार आणि 15 षटकार).
वर्ल्ड रेकॉर्ड: एकाच डावात 15 षटकार मारत त्याने अंडर-19 क्रिकेटच्या इतिहासात एका डावात सर्वाधिक षटकार मारण्याचा विक्रम स्वतःच्या नावे केला.

आवृत्तीतील सर्वाधिक षटकार: या विश्वचषक स्पर्धेत वैभवच्या नावावर आता सर्वाधिक षटकारांची नोंद झाली आहे. अंतिम सामन्यापूर्वी त्याच्या खात्यात 16 षटकार होते, ज्यात आता मोठी भर पडली आहे.इंग्लंडच्या गोलंदाजीचे वाभाडे
वैभवच्या या खेळीमुळे इंग्लंडचा कर्णधार आणि गोलंदाज पूर्णपणे हतबल दिसले. मैदानातील प्रत्येक कोपऱ्यात त्याने चेंडू टोलवला. विशेषतः स्पिनर्सविरुद्ध त्याने आक्रमक पवित्रा घेत एकाच षटकात अनेक मोठे फटके लगावले. त्याच्या या 175 धावांच्या खेळीमुळे भारताने फायनलमध्ये विजेतेपदाच्या दिशेने भक्कम पाऊल टाकले आहे.