Trap Deal : संसदेत आजही गदारोळ! अर्थसंकल्पावरील चर्चेपूर्वीच घोषणाबाजी; ‘ट्रॅप डील’वरून विरोधक आक्रमक
•लोकसभेचे कामकाज दुपारी 12 पर्यंत तहकूब; ‘ट्रॅप डील’चे फलक घेऊन विरोधकांची संसदेबाहेर जोरदार निदर्शने
ANI | संसदेच्या अर्थसंकल्पीय अधिवेशनाचा आजचा दिवसही वादळी ठरला आहे. केंद्रीय अर्थसंकल्प 2026-27 वर आज संसदेत सर्वसाधारण चर्चा होणे अपेक्षित असताना, कामकाज सुरू होताच विरोधकांनी विविध मुद्द्यांवरून गोंधळ घातला. यामुळे लोकसभेचे कामकाज अवघ्या काही मिनिटांतच दुपारी 12 वाजेपर्यंत तहकूब करावे लागले.
प्रश्नोत्तराचा तास गदारोळात वाहून गेला
लोकसभेचे कामकाज सकाळी 11 वाजता प्रश्नोत्तराच्या तासाने सुरू झाले. मात्र, माजी लष्करप्रमुख मनोज नरवणे यांच्या पुस्तकातील दावे आणि भारत-अमेरिका व्यापारी करारावरून (Trade Deal) विरोधकांनी सभापतींच्या समोरील मोकळ्या जागेत (वेलमध्ये) येऊन जोरदार घोषणाबाजी केली. लोकसभा अध्यक्ष ओम बिर्ला यांनी खासदारांना शांत राहण्याचे आवाहन केले, परंतु गोंधळ न थांबल्याने त्यांनी सभागृह तहकूब केले.
‘ट्रेड डील’ की ‘ट्रॅप डील’? विरोधकांचे अनोखे आंदोलन
सभागृहाचे कामकाज सुरू होण्यापूर्वीच विरोधी पक्षाच्या खासदारांनी संसदेच्या आवारात निदर्शने केली. यावेळी त्यांच्या हातात केंद्र सरकारच्या प्रस्तावित व्यापारी कराराविरोधात फलक होते. “हा ‘ट्रेड डील’ नसून भारतासाठी ‘ट्रॅप डील’ (साखळदौंड) आहे,” असा आरोप करत विरोधकांनी सरकारला धारेवर धरले. या करारातून देशाचे हित धोक्यात येत असल्याचा दावा काँग्रेससह मित्रपक्षांनी केला आहे.
