Taloja Latest Fire News : रात्री साडेनऊ ते पहाटे साडेपाचपर्यंत अग्निशमन दलाची झुंज; जीवितहानी टळली मात्र कोट्यवधींचे नुकसान
नवी मुंबई | तळोजा औद्योगिक वसाहतीमध्ये गुरुवारी रात्री भीषण आगीची घटना घडली. एका रासायनिक कारखान्यात झालेल्या साखळी स्फोटांमुळे आगीने उग्र स्वरूप धारण केले, ज्यामध्ये एकाच वेळी तीन कारखाने आगीच्या भक्ष्यस्थानी पडले. अग्निशमन दलाने तब्बल आठ तासांच्या शर्थीच्या प्रयत्नांनंतर पहाटे साडेपाच वाजता ही आग आटोक्यात आणली. सुदैवाने, कामगारांनी प्रसंगावधान राखल्याने मोठी जीवितहानी टळली आहे. Taloja Fire News
नेमकी घटना कशी घडली?
तळोजा एमआयडीसीतील भूखंड क्रमांक बी-42 वर असलेल्या ‘विघ्नहर्ता’ या अगरबत्ती निर्मितीसाठी रसायन बनवणाऱ्या कंपनीत ही आग लागली. या कंपनीत रसायनांची सुमारे 150 पिंपे साठवून ठेवण्यात आली होती. रात्री साडेनऊच्या सुमारास यातील ‘सॉल्व्हन्ट’ रसायनाने अचानक पेट घेतला. एकामागून एक झालेल्या भीषण स्फोटांमुळे कारखान्यातील लोखंडी पत्रे उडून रस्त्यावर पडली.
आगीचे लोण पसरले रस्त्यावर
पिंपांमधील जळते रसायन रस्त्यावर आणि गटारात सांडल्याने आगीने अधिकच रौद्र रूप धारण केले. यामुळे लगतच्या भूखंड क्रमांक बी-41 आणि बी-43 मधील कारखान्यांनाही आगीने वेढले. स्फोटांचे आवाज इतके तीव्र होते की परिसरातील नागरिकांमध्ये घबराट पसरली होती.
अग्निशमन दलाची ‘वॉटर आणि फोम’ कामगिरी
आगीची माहिती मिळताच तळोजा एमआयडीसी अग्निशमन दलाचे अधिकारी रत्नाकर पाटील आणि त्यांचे पथक पाच मिनिटांत घटनास्थळी दाखल झाले. आगीची तीव्रता पाहून सिडको, पनवेल आणि नवी मुंबई महापालिकेचे अतिरिक्त बंब पाचारण करण्यात आले. रसायनांची आग असल्याने पाणी आणि फोमचा (Face Foam) मारा करून पहाटे ही आग पूर्णपणे विझवण्यात आली.
सुरक्षेचा प्रश्न पुन्हा ऐरणीवर
या आगीत तीनही कारखान्यांमधील यंत्रसामग्री आणि कच्चा माल जळून खाक झाला असून मोठे आर्थिक नुकसान झाले आहे. आगीचे नेमके कारण अद्याप समजू शकलेले नाही. मात्र, या घटनेमुळे औद्योगिक वसाहतीतील घातक रसायनांची साठवणूक आणि अग्निशमन यंत्रणेच्या सुरक्षेबाबत पुन्हा एकदा प्रश्नचिन्ह उपस्थित झाले आहे.
