Tilak Vidyalaya Bomb Spot Threat : मुंबईतील टिळक विद्यालयाला बॉम्बस्फोटाची धमकी; पहाटे 4.30 वाजता ई-मेलद्वारे दिला इशारा

•Mumbai Tilak Vidyalaya Bomb Spot Threat आरडीएक्सने शाळा उडवण्याची धमकी, बॉम्ब शोधक पथकाची तपासणी, कोणतीही संशयास्पद वस्तू आढळली नाही

मुंबई | मुंबईतील धमकी ई-मेल प्रकरणांत आणखी एका शाळेची भर पडली आहे. विलेपार्ले परिसरातील टिळक विद्यालयाच्या ई-मेल आयडीवर बुधवारी पहाटे साडेचारच्या सुमारास एक धमकीचा मेल प्राप्त झाला. या मेलमध्ये शाळा आरडीएक्सने उडवून देण्याची धमकी देण्यात आली होती.

हा प्रकार शाळेतील कर्मचाऱ्यांच्या लक्षात आल्यानंतर त्यांनी तातडीने सुरक्षा यंत्रणांना याबाबत माहिती दिली. मुख्य सुरक्षा अधिकारी संजय तोणपी यांनी मुंबई पोलिसांच्या नियंत्रण कक्षाशी संपर्क साधून घटनास्थळी पोलिस, बॉम्ब शोधक व नाशक पथकाला पाचारण केले. शाळेची कसून तपासणी करण्यात आली, मात्र कोणतीही संशयास्पद वस्तू आढळली नाही, अशी माहिती अधिकाऱ्यांनी दिली.

या घटनेपूर्वीही गोवंडी व कांदिवली येथील दोन आंतरराष्ट्रीय शाळांना अशाच प्रकारचे बॉम्बस्फोट घडवून आणण्याचे मेल आले होते. त्यामुळे शाळांमध्ये भीतीचं वातावरण निर्माण झालं आहे. नाखिरान डॉट गोपाळ नावाच्या ई-मेल आयडीवरून ही धमकी आल्याची माहिती समोर आली आहे. पोलिसांनी मेलचा स्त्रोत शोधण्यासाठी सायबर तांत्रिक तपास सुरू केला आहे.

हा प्रकार खोडसाळपणाचा असण्याची शक्यता असून, पालक व विद्यार्थ्यांनी अफवांवर विश्वास ठेवू नये, असे आवाहन करण्यात आले आहे. मुंबई पोलिस यंत्रणा सतर्क असून, अशा प्रकारांवर कठोर कारवाई केली जाईल, असा इशाराही देण्यात आला आहे.